საზოგადოება საზოგადოებრივი მაუწყებლის სამეურვეო საბჭოს გადაწყვეტილებას ელის.
ხვალ, რვაკაციანმა ბორდმა ექვსი წლით ტელევიზიის ახალი გენერალური დირექტორი უნდა აირჩიოს. თიკო ბერძენიშვილი, ნინო ზაუტაშვილი, ვასილ მაღლაფერიძე, ნათია კუპრაშვილი თუ ზაალ ანჯაფარიძე: ფარული კენჭისყრის დროს არჩევანი ხუთ კანდიდატს შორის უნდა გაკეთდეს.
მანამდე კი მეურვეებმა გასაუბრების მეორე ტურში ნინო ზაუტაშვილს და ვასილ მაღლაფერიძეს მოუსმინეს.
სანდოობა, იდეის გარშემო გაერთიანებული ადამიანები, ხარისხიანი გადაცემები, ტელევიზიის დაფარვის პრობლემის მოგვარება, შემეცნებით-საგანმანათლებლო მიმართულებების გაძლიერება, თანამშრომლებისთვის თავისუფალი სივრცის შექმნა-ეს „რეალური სივრცის” ავტორის და წამყვანის პრიორიტეტებია.
ვასილ მაღლაფერიძის ხედვა კი ნდობის და რეიტინგის ზრდას, პირველობისთვის ბრძოლას, მაღალი ჟურნალისტური სტანდარტების დამკვიდრებას და ტელევიზიის თანამედროვე ტექნიკით აღჭურვას მოიცავს. გასაუბრების დროს დაისვა მწვავე კითხვებიც. ბორდის ერთ-ერთმა წევრმა მაღლაფერიძეს პოლიტიკურ წარსულსა და სიმპატიებზე ჰკითხა.