ოკუპირებულ აფხაზეთში მომხდარი ვანდალური ფაქტის შემდეგ, რუსეთის თავდაცვის სამინისტრო პირველ კომენტარს აკეთებს.
უწყება გულრიფშის რაიონის სოფელ წებელდაში, რუსეთის მიერ სამხედრო პოლიგონის მშენებლობას უარყოფს.
წაგიკითხავთ „რია ნოვოსტის" მიერ გავრცელებულ ინფორმაციას: „სამხრეთის სამხედრო ოლქის პრესსამსახურში გაოგნება გამოიწვია საერთაშორისო საკითხებში საქართველოს პრეზიდენტის მრჩევლის განცხადებამ, სოფელ წებელდაში თითქოსდა რუსული სამხედრო პოლიგონის მშენებლობის შესახებ. არავითარი სამშენებლო ან სხვა სახის სამუშაოები რუსეთის შეიარაღებული ძალების მე-7 სამხედრო ბაზის ინტერესებში არ არის და არც იგეგმება“, -ნათქვამია ტექსტში.
სამხედრო პოლიგონის მშენებლობას არ ადასტურებენ ოკუპირებული აფხაზეთის დე ფაქტო თავდაცვის სამინისტროშიც.
შეგახსენებთ, რომ სოფელ წებელდაში პოლიგონის მოწყობის დროს, საოკუპაციო ძალებმა მერვე საუკუნის დროინდელი ეკლესია და პოლონელთა სამარხები გაანადგურეს.
სწორედ წებელდაში მომხდარ ვანდალურ ფაქტზე პრეზიდენტის საგარეო ურთიერთობათა მდივანმა ინფორმაცია უკვე მიაწოდა საერთაშორისო ორგანიზაციებს.
გიორგი მარგველაშვილის დავალებით, თენგიზ ფხალაძე ევროკავშირის მონიტორინგის მისიის ხელმძღვანელს და საქართველოში ევროსაბჭოს მუდმივ წარმომადგენელს შეხვდა. საუბარი შეეხო ოკუპირებულ აფხაზეთში მიმდინარე პროცესებს და ბოლო პერიოდში ქართული კულტურული მემკვიდრეობის ძეგლთა განადგურების ფაქტებს.