ოკუპირებული აფხაზეთის ე.წ. საგარეო უწყება წებელდაში ისტორიული ძეგლის დაზიანების ფაქტს ადასტურებს, პოლიგონის მშენებლობას კი უარყოფს.

დე ფაქტო უწყება განცხადებას ავრცელებს, სადაც ნათქვამია, რომ სოფელ წებელდაში სამხედრო პოლიგონის მშენებლობასთან დაკავშირებული ინფორმაცია სინამდვილეს არ შეესაბამება.

დე ფაქტო რეჟიმის წარმომადგენელთა თქმით, სოფელში უკვე არსებობს აფხაზეთის ე.წ. თავდაცვის სამინისტროს პოლიგონი, რომელსაც რუსი სამხედროები იყენებენ.

საოკუპაციო რეჟიმის ე.წ. საგარეო უწყება ასევე ეხმაურება ისტორიული ძეგლის განადგურების შესახებ თბილისში გაკეთებულ განცხადებებს და ამტკიცებს, რომ ადგილი აქვს „რეალობის დამახინჯებას“.

„ტერიტორიის გაწმენდის დროს მართლაც დაზიანდა ისტორიული ძეგლი. ამ საქმის შესასწავლად და შესაბამისი ზომების მისაღებად, უკვე შექმნილია სპეციალური კომისია აფხაზეთის კულტურისა და ისტორიული მემკვიდრეობის და თავდაცვის სამინისტროს სპეციალისტების შემადგენლობით, რომელიც შეაფასებს ძეგლისთვის მიყენებულ ზიანს. მუშაობის შედეგები მედიით გახმოვანდება და მისი გაცნობა ნებისმიერი დაინტერესებული პირისთვის იქნება ხელმისაწვდომი“, - ნათქვამია ე.წ. სამინისტროს მიერ გაკეთებულ კომენტარში.

დე ფაქტო რეჟიმი აცხადებს, რომ მათ გაოცებას იწვევს აღნიშნული ძეგლის საკითხზე თბილისის მიმართვა იუნესკოსადმი. საოკუპაციო რეჟიმი ქართულ საჯარისო შენაერთებს 1992-93 წლებში კულტურული მემკვიდრეობის განადგურებაში სდებს ბრალს.