საქართველოს 20 წლამდე მორაგბეთა ნაკრები 2017 წლის მსოფლიო ჩემპიონატისთვის ემზადება.

ილია მაისურაძის გუნდი 16 იანვრიდან წლის პირველ მოსამზადებელ ეტაპს შევარდენის ბაზაზე ატარებს. ახალგაზრდა ბორჯრალოსნები, დღეს, ჯიქებს დაუპირისპირდნენ და მეტოქის ჩათვლის მოედანი 5-ჯერ აიღეს. ჯიქებმა კი მხოლოდ ერთი ლელოს დადება მოახერხეს.

მორიგ ტესტ-შეხვედრას 20 წლამდე ნაკრები ლელო სარასენსთან 27 იანვარს გამართავს. მსოფლიოს ჩემპიონატამდე, მაისურაძის გუნდი კიდევ სამ მნიშვნელოვან ამხანაგურ მატჩს თბილისში, სამხრეთ აფრიკის ვესთერნპროვინსის აკადემიის გუნდის წინააღმდეგ ჩაატარებს.

მორაგბეთა ახალგაზრდული მსოფლიოს ჩემპიონატი საქართველოში 31 მაისიდან 18 ივნისის ჩათვლით ჩატარდება. საქართველოს ნაკრები პლანეტის 12 საუკეთესო გუნდში ზედიზედ მეორედ იასპარეზებს.

წლევანდელ მსოფლიოს ჩემპიონატზე, ჩვენი გუნდის მეტოქეები ჯგუფში: არგენტინის, სამხრეთ აფრიკისა და საფრანგეთის ახალგაზრდული გუნდები იქნებიან. მატჩები თბილისსა და ქუთაისში გაიმართება.

შეგახსენებთ, რომ საქართველოს 20 წლამდე ნაკრები რეიტინგში ელიტარულ 12 ნაკრებს შორის მეათე პოზიციაზეა.