დრანდის ციხის პატიმარ გიორგი ლუკავას ადგილსამყოფელი ამ დრომდე უცნობია. მისი ოჯახის წევრების განცხადებით, აფხაზეთის ომის მონაწილე მათ ტელეფონით დაუკავშირდა და შეატყობინა, რომ ციხიდან მისი სხვაგან გადაყვანა იგეგმებოდა.
ამის შემდეგ კონტაქტი შეწყდა. ოჯახის წევრები ვარაუდობენ, რომ ის მოკლულია.ლუკავას ახლობლები ხელისუფლებისგან დახმარებას ითხოვენ, წინააღმდეგ შემთხვევაში კი, საპროტესტო აქციებით იმუქრებიან.
საქმეს უკვე გამოეხმაურა სახელმწიფო უსაფრთხოების სამსახური. გავრცელებული განცხადების მიხედვით, მომხდართან დაკავშირებით ევროკავშირის მონიტორინგის მისია უკვე ინფორმირებულია. მათი მეშვეობით გააქტიურდა ცხელი ხაზი.
"აფხაზეთის საოკუპაციო რეჟიმი ლუკავას ციხიდან გაყვანის ფაქტს არ ადასტურებს. საერთაშორისო ორგანიზაციებთან ერთად, ლუკავას საქმეზე მუშაობა გრძელდება", - აცხადებენ სახელმწიფო უსაფრთხოების სამსახურში.
გიორგი ლუკავა ოკუპირებული აფხაზეთის ტერიტორიაზე 5 წლის წინ დააკავეს და უვადო პატიმრობა მიუსაჯეს.