დღეს საქართველოს სპორტული საზოგადოება გამოჩენილ ქართველ ხელბურთელს ამბერკი ტაბიძეს გამოეთხოვა, რომელიც 28 იანვარს 64 წლის ასაკში მძიმე ავადმყოფობის შემდეგ გარდაიცვალა.

ქართული ხელბურთის ისტორიაში ერთ-ერთი გამორჩეული მოთამაშე, საბჭოთა კავშირის თასის მფლობელი, ჩემპიონატის სამგზის ბრინჯაოს მედლის მფლობელი, მერვე ხალხთა სპარტაკიადის საუკეთესო ბომბარდირი - ეს იმ ტიტულების არასრული ჩამონათვალია, რომელიც ტაბიძემ კარიერაში მოიპოვა.

ტაბიძე გახლდათ საერთაშორისო კლასის ოსტატი, სპორტის დამსახურებული მუშაკი და საქართველოს ღირსების ორდენის კავალერი.