2018 წელს, როდესაც ახალი სამაუწყებლო ბადე იქნება შემუშავებული, დაბრუნდება იმდენი გადაცემა, რამდენის დაფინანსებასაც მაუწყებელი იმ დროისთვის შეძლებს.
ამის შესახებ საზოგადოებრივი მაუწყებლის გენერალურმა დირექტორმა ვასილ მაღლაფერიძემ „მოამბის“ პირდაპირ ეთერში განაცხადა.
„ახალი გადაცემები დაბრუნდება იმ პრინციპით, დირექტორს რომ უნდა და რომელიმე თანამშრომელს კი არა, ან ვიღაცამ ზარი განახორციელა, ეს დაბრუნდება გამჭვირვალობის, კონკურსის პრინციპით.
დაბრუნდება იმდენი გადაცემა, რამდენის ზიდვაც შეეძლება საზოგადოებრივ მაუწყებელს იმ დროისთვის. 2018 წლიდან ეტაპობრივად დავიწყებთ ამ გადაცემების შემოყვანას.
დღეს ასეთი პრაქტიკაა, რომ გადაცემები ჩაეშვება და ის არ არის უზურნველყოფილი კამერით, „პეტლიჩკით“ და ფაქტობრივად, ეთერში სერვერები ფეთქდება, გადაცემა ვერ გადის. ეს აბსოლუტურად მიუღებელი პრაქტიკაა.
რამდენი გადაცემა დაბრუნდება და როგორ, დამოკიდებული იქნება იმ ფინანსურ შესაძლებლობაზე, რაც ექნება საზოგადოებრივ მაუწყებელს იმ მომენტისთვის“,- განაცხადა მაღლაფერიძემ.