როგორ უნდა განვითარდეს და გარდაიქმნას საზოგადოებრივი მაუწყებელი 2017-2019 წლებში?

მაუწყებლის გენერალური დირექტორის ხედვით, არსებული კრიზისის დასაძლევად, „მოამბის“ გარდა, მაუწყებლის ყველა პლატფორმაზე ყველა გადაცემა და წარმოება უნდა დაიხუროს. ასევე მოხდეს თანამშრომელთა რაოდენობის ოპტიმიზაცია.

ამ გზით მენეჯმენტი ყოველწლიურად დაახლოებით 15 მილიონი ლარის დაზოგვას გეგმავს. სამი წლის განმავლობაში გამოთავისუფლებელი თანხა კი უნდა მოხმარდეს მატერიალურ-ტექნიკური და ტექნოლოგიური ბაზის განახლებას. ასევე მაუწყებელი უნდა გადავიდეს ყველა სეგმენტში კონკურენციის პრინციპზე.

წარდგენილი სტრატეგიის ფორმის და რეფორმის დაწყების ვადებზე საბოლოო გადაწყვეტილება სამეურვეო საბჭომ უნდა მიიღოს, რომელიც გეგმის საჯარო განხილვას იწყებს.

სამეურვეო საბჭო გადაწყვეტილების მიღებამდე, შეხვედრებს თანამშრომლებთან, არასამთავრობო სექტორის წარმომადგენლებთან და ყველა დაინტერესებულ მხარესთან გეგმავს.

საკუთარი ხედვა ვასილ მაღლაფერიძემ, დღეს, დირექტორთა საბჭოს წევრებთან ერთად წარადგინა. პრესკონფერენციაზე ყურადღება გამახვილდა 10 წლის განმავლობაში დახარჯულ საბიუჯეტო სახსრებზე, რომელმაც საერთო ჯამში 410 მილიონი ლარი შეადგინა. მაღლაფერიძის განცხადებით, ამ თანხის მხოლოდ 5 პროცენტი გაიხარჯა ტექნიკურ უზრუნველყოფაზე. დღეს არსებული ვითარებით კი საზოგადოებრივმა, შესაძლოა, მაუწყებლობა საერთოდ ვეღარ გააგრძელოს.