საგამოძიებო უწყებები ისევ ნიკა გვარამიას კრიტიკის სამიზნეებად რჩებიან. სასამართლოში დაკითხვის შემდეგ „რუსთავი ორის” გენერალური დირექტორი მის წინააღმდეგ ახალი საქმის აღძვრას პროგნოზირებს.

ოქტომბერში გავრცელებული ფარული ჩანაწერის ერთ-ერთი ფიგურანტი, გამოძიების არასწორი მიმართულებით წარმართვაზეც საუბრობს.

კრიმინალურ პოლიციაში არმისვლის შემდეგ, გვარამიამ ავთენტურად გამოცხადებულ ჩანაწერზე ჩვენება საქალაქო სასამართლოს მისცა და მას და მამუკა ახვლედიანს შორის გამართული საუბრის შინაარსი დამონტაჟებულად გამოაცხადა.

ანალოგიური პოზიცია აქვს საქალაქო სასამართლოს გადაყენებულ თავმჯდომარესაც. თუმცა საუბრის მონაწილე პირების რაოდენობასთან დაკავშირებით, გვარამიას და ახვლედიანის განცხადებები ერთმანეთს არ ემთხვევა.