„მაღალი იერარქიის სასულიერო პირის სიცოცხლის ხელყოფა არა პროკურატურის, არამედ იმ მოქალაქის განცხადებაა, ვინც საგამოძიებო უწყებას მიმართა“,- ასეთია პირველი განმარტება, რომელსაც დეკანოზ გიორგი მამალაძის საქმეზე პროკურატურა გახმაურებული პრესკონფერენციის შემდეგ აკეთებს.
უწყების საზოგადოებასთან ურთიერთობის სამსახურის ხელმძღვანელი აცხადებს, რომ ირაკლი შოთაძეს ბრიფინგზე არ გაუკეთებია განცხადება, რომლის მიხედვითაც, სრულიად საქართველოს პატრიარქს ან რომელიმე სასულიერო პირს ემუქრება საფრთხე.
13 თებერვლის შემდეგ, პროკურატურის და მმართველი გუნდის წევრების მიერ გაკეთებული განცხადებების გამო, ოპოზიცია, დღეს, ხელისუფლებას მოქალაქეების შეცდომაში შეყვანაში სდებს ბრალს და პასუხისმგებლობას აკისრებს, თუმცა უმრავლესობისთვის პრეტენზიები მიუღებელია.