უამინდობის გამო საავტომობილო გზებზე დაწესებული შეზღუდვები რამდენიმე მონაკვეთზე უკვე მოხსნილია.

გაწმენდითი სამუშაოების შედეგად, ალპანა-ცაგერის გზაზე გადაადგილება თავისუფალია. ხოლო ქუთაისი-წყალტუბო-ცაგერი-ლენტეხის მონაკვეთზე დაწესებული რეჟიმი შემცირდა და მსუბუქი ავტომობილები გზის ამ ნაწილზე შეუზღუდავად მოძრაობენ.

აღარ თოვს იმერეთში, თუმცა ჰაერის ტემპერატურამ ღამის საათებში მინუს 8 გრადუსს მიაღწია. სამხარეო ადმინისტრაციაში აცხადებენ, რომ მხარის 12-ვე მუნიციპალიტეტი მუშაობის საგანგებო რეჟიმზეა გადასული. გაწმენდითი სამუშაოები ინტენსიურად მიმდინარეობს.

გამოიდარა აჭარაშიც. რეგიონში თოვა გუშინ საღამოს შეწყდა, თუმცა ტემპერატურის მკვეთრი ვარდნის გამო, გზებზე ისევ პრობლემებია. მოიყინა ქუჩებისა და ტროტუარების ნაწილი. თოვლის საფარმა მთიან აჭარაში 2 მეტრს გადააჭარბა, რის გამოც სოფლებთან დამაკავშირებელი გზები ჩაიკეტა.

მიმდინარეობს გაწმენდითი სამუშაოები და გზების გახსნას უახლოეს დღეებში ვარაუდობენ. რეგიონს სრულად მიეწოდება ელექტროენერგია და ბუნებრივი აირი.