დღეს და ხვალ უეფას ჩემპიონთა ლიგის გათამაშება ფლეი-ოფის ოთხი შეხვედრით გაგრძელდება.

მერვედფინალური ეტაპის პირველი მატჩები დღეს ლევერკუზენსა და მანჩესტერში გაიმართება. ლევერკუზენის "ბაიერი" საკუთარ ბაი არენაზე, მადრიდის "ატელტიკოს" მიიღებს. ეს გუნდები, ჩემპიონთა ლიგის პლეი-ოფში შარშანწინაც დაუპირსპირდნენ ერთმანეთს და ორი მატჩის ჯამში, პენალტების სერიაში ესპანურმა გუნდმა გაიმარჯვა.

დღევანდელ შეხვედრას, ორივე კლუბი დანაკლისით ხვდება. მასპინძლებს ჰაკან ჩალჰანოღლუ და ჯონათან ტაჰი ვერ დაეხმარებიან. "ატლეტიკო" კი, ტიაგო მენდეშს, დიეგო გოდინს, აუგუსტო ფერნანდესს და ხუან ფრანს მოისაკლისებს. თამაშის მთავარი არბიტრი, შოტლანდიელი, უილიამ კოლამი იქნება.

დღის მეორე შეხვედრა მანჩესტერის იტიჰადზე გაიმართება, სადაც "სიტი" "მონაკოს" უმასპინძლებს. ბოლო პერიოდში ორივე გუნდი დამაჯერებელ ფეხბურთს თამაშობს. "მონაკო" საფრანგეთის ჩემპიონატის ლიდერია." სიტი" ინგლისის პრემიერლიგაში ამ ეტაპზე, მეორე ადგილზეა.

აღსანიშნავია, რომ მანჩესტერელებს ჩემპიონთა ლიგაზე ბოლო 9 შეხვედრაში საკუთარ მოედანზე არ წაუგიათ. ხოსეპ გვარდიოლას გუნდი ბრაზილიელი გაბრიელ ჟესუსის გარეშე იასპარეზებს.

თამაშის მთავარი არბიტრი ესპანელი ანტონიო მატეო ლაოსი იქნება. ორივე მატჩი თბილისის დროით 23 საათსა 45 წუთზე დაიწყება და ორივეს პირდაპირ რეპორტაჟს საზოგადოებრივი მაუწყებელი შემოგთავაზებთ.