2-3 მარტს საქართველოს ნატო-ს სამხედრო კომიტეტი ეწვევა. ნატო-ს სამეკავშირეო ოფისის ხელმძღვანელის უილიამ ლაჰიუს განმარტებით, ორდღიანი ვიზიტის ფარგლებში, სამხედრო კომიტეტის წარმომადგენლები თავდაცვის მინისტრ ლევან იზორიას შეხვდებიან. ბრიუსელში დაბრუნების შემდეგ კი სამხედრო კომიტეტი ნატო-ს შტაბ-ბინას ინფორმაციას საქართველოს პერსპექტივებისა და სამხედრო ასპექტების შესახებ მიაწვდის.
უილიამ ლაჰიუს განცხადებით, 2017 წელი ნატო-საქართველოს ურთიერთობებში აქტიური იქნება. 4 მარტს საქართველოს ოფიციალური ვიზიტით ნატო-ს გენერალური მდივნის სპეციალური წარმომადგენელი მარიეტ შურმანი ეწვევა. მაისში კი თბილისში ნატო-ს საპარლამენტო ასამბლეა ჩამოვა. 3 აპრილს ნატო-ს კვირეული დაიწყება და 11 აპრილს დიპლომატიური ფორმით დასრულდება.
ნატო-ს სამეკავშირეო ოფისმა ჟურნალისტებს 2017 წლის ნატო-ს დღის წესრიგიც გააცნო. მაისის ბოლოს ბრიუსელში ნატო-ს სამიტი გაიმართება, რომელსაც ამერიკის პრეზიდენტი დონალდ ტრამპიც დაესწრება.
მიმდინარე წელს ჩრდილოატლანტიკური ალიანსი შავ ზღვაზე პატრულირებისთვის საკუთარ წარმომადგენლობას გააძლიერებს. მულტიეროვნულ ძალებს შავ ზღვაზე რუმინეთი წარუძღვება.
რაც შეეხება ნატო-რუსეთის ურთიერთობებს, უილიამ ლაჰიუს განცხადებით, 2014 წლის შემდეგ მხარეებს შორის კონტაქტი მინიმალურია. რუსეთსა და ალიანს შორის მთავარი უთანხმოების საგანი რუსეთის მიერ ყირიმის ანექსიაა.