რუსეთ-ბელარუსის სამხედრო სწავლებას “დასავლეთი-2017-ს” ნატო-სა და უკრაინის სამხედრო ექსპერტები დაესწრებიან. ამის შესახებ ალიანსის გენერალურმა მდივანმა იენს სტოლტენბერგმა განაცხადა.

მისი თქმით, მოწვევა მინსკიდან მიიღეს, თუმცა დასწრება მხოლოდ კონკრეტულ 5 დღეს ითვალისწინებს, რასაც, სტოლტენბერგის შეფასებით, რეალურ მონიტორინგთან საერთო არაფერი აქვს.

ალიანსის გენერალური მდივანი ბელარუსის მხარეს მოუწოდებს, მიანიჭონ ნატო-ს წვრთნებზე სრული დაკვირვების უფლება. აღსანიშნავია, რომ ნატომ მიწვევა რუსული მხარისგანაც მიიღო, თუმცა მხოლოდ ერთი დღის ვადით. რუსეთ-ბელარუსის ერთობლივ სწავლებას უკრაინის ორი წარმომადგენელიც დაესწრება.

წვრთნებზე დასასწრებად მიწვევა გაეგზავნათ ასევე ესტონეთს, ლატვიას, ლიტვას, ნორვეგიას, პოლონეთსა და შვედეთს. სწავლება 14-დან 20 სექტემბრის ჩათვლით გაიმართება და მასში მონაწილეობას 13 ათასამდე სამხედრო და 700-მდე საბრძოლო ტექნიკა მიიღებს.