ლატვიის საგარეო საქმეთა მინისტრი ედგარს რინკევიჩსი სექტემბერში დაგეგმილი რუსეთ-ბელარუსის ერთობლივი სამხედრო წვრთნის დროს პროვოკაციებს არ გამორიცხავს. ამის შესახებ ლატვიის მთავარმა დიპლომატმა ადგილობრივ ტელეკომპანია LNT-თან ინტერვიუში განაცხადა.

„ასეთი მასშტაბის წვრთნები როდესაც იმართება, არასდროს უნდა გამორიცხოს სხვადასხვა სახის შემთხვევები, რომლებიც შესაძლოა, ფართომასშტაბურ კრიზისში გადაიზარდოს. რაც შეეხება სამხედრო თავდასხმის საფრთხე, სავარაუდოდ, მსგავსი რამ არ მოხდება, ნაწილობრივ იმის გათვალისწინებით, რომ ჩვენთან უკვე ერთი წელია ნატო-ს კონტინგენტია განთავსებული, ხოლო წვრთნის დროს კიდევ დამატებითი ზომები ამოქმედდება. ჩვენ, როგორც თავდაცვისა და საგარეო საქმეთა სამინისტროები, ისე ნატო-ს მოკავშირეები, ყურადღებით დავაკვირდებით სამხედრო სწავლებას“, - განაცხადა ლატვიის საგარეო საქმეთა მინისტრმა.

რინკევიჩსი არ გამორიცხავს, რომ მანევრების დროს შესაძლოა, განზარხ ან შემთხვევით დაირღვეს ბალტიის ქვეყნების საჰაერო სივრცე.

რინკევიჩსის თქმით, ლატვიამ რუსეთისგან და ბელარუსისგან წვრთნის ფინალურ ეტაპზე სამი დამკვირვებლის გაგზავნის შეთავაზება მიიღო.

„რუსეთმა მიგვიწვია ამ მანევრების მხოლოდ დასკვნით ფაზაზე დამკვირვებლებად და ეს არასაკმარისად მიგვაჩნია. ვფიქრობთ, რომ საჭიროა მეტი გამჭვირვალობა. იმის მიუხედავად, რომ ეს წვრთნა ლატვიისთვის პირდაპირ სამხედრო საფრთხეს წარმოადგენს, ჩვენ მზად უნდა ვიყოთ სხვადასხვა შემთხვევისთვის. მსგავსი მასშტაბის მანევრები ყოველთვის არის დამატებითი დაძაბულობის ელემენტი“, -განაცხადა ლატვიელმა დიპლომატმა.

სამხედრო სწავლება „ზაპად 2017“ 14 სექტემბერს დაიწყება.