პოლიტიკური ცენტის „გირჩის“ ოფისში შინაგან საქმეთა სამინისტროს წარმომადგენლები მივიდნენ.

ინფორმაციას პოლიტიკური ცენტრი „ფეისბუქის“ პირად გვერდზე ავრცელებს.

ამ წუთებში ოქმის შედგენის პროცედურა მიმდინარეობს. ცნობილია, რომ შს სამინისტროს თანამშრომელმა ნარკოტიკი ჩაიბარა და დალუქა.

პოლიტიკურმა ცენტრმა „გირჩი“ დღეს საღამოს სპეციალურ პრესკონფერენციაზე ექსპერიმენტის შედეგები გაასაჯაროვა.

პარტიის ერთ-ერთი ლიდერის, ზურაბ ჯაფარიძის განცხადებით, მათ ჩაატარეს ექსპერიმენტი, ინტერნეტით იყიდეს 5 გრამი ნარკოტიკი.

„ერთ მხრივ, დღეს ქვეყანაში არის რეალობა, როცა კანაფის კულტივაციისა და მოხმარებისთვის იჭერენ, ხოლო მეორე მხრივ ბიოს შეძენა ძალიან მარტივია" - აცხადებს ჯაფარიძე.

ზურაბ ჯაფარიძის განცხადებით, მათ ამ ექსპერიმენტით იმის თქმა სურთ, თუ რა მარტივია ქვეყენაში ბიოს მოძიება.

პარტიის ლიდერის განცხადებით, ბიო 400-ჯერ უფრო მძიმეა, ვიდრე მარიხუანა, ხოლო ბიოს შეძენით ქვეყნიდან თვეში 6 000 000 ლარი გაედინება.

როგორც ჯაფარიძემ პრესკონფერენციაზე აღნიშნა, ისინი აპირებენ ნაყიდი ნარკოტიკის პოლიციისთვის ნებაყოფლობით გადაცემას, რაც მათი თქმით, 260-ე მუხლის მიხედვით, სისხლის სამართლის პასუხისმგებლობიდან გაათავისუფლებს.