ავლაბრის სასახლეში გამართულ შეხვედრაზე პრეზიდენტმა საკონსტიტუციო ცვლილებებთან დაკავშირებით ბოლო დროის განხილვებზეც ისაუბრა. გაიხსენა დრო, როდესაც, მისი თქმით, კონსტიტუცია კაბინეტებში იწერებოდა და თქვა, რომ ეს მიდგომა უნდა შეიცვალოს.
გიორგი მარგველაშვილის განცხადებით, კონსტიტუცია თავისუფალი მოქალაქეების თავისუფალ ნებას უნდა ასახავდეს. მისივე განმარტებით, კამპანია „კონსტიტუცია ყველასია“ საინფორმაციო ხასიათისაა და ის არ ქმნის საკონსტიტუციო კომისიის ალტერნატიულ პროცესს ან დოკუმენტს.
პრეზიდენტის ადმინისტრაციის უფროსის ინფორმაციით, სახალხო განხილვა მთელ საქართველოს მოიცავს და პირველი რეგიონული შეხვედრა თელავში გაიმართება. დღესვე გიორგი მარგველაშვილმა კამპანიის ფარგლებში დიპლომატებს მედიისთვის დახურულ აუდიენციაზე უმასპინძლა.