ოკუპირებულ აფხაზეთში გამართულ ე.წ საპარლამენტო არჩევნებში, 35 ე.წ. კანდიდატიდან მხოლოდ 12 აირჩიეს. 22 ოლქში დე ფაქტო არჩევნები 26 მარტს ხელახლა უნდა ჩატარდეს.

არსებული მონაცემებით, რეგიონის დე ფაქტო ექსპრეზიდენტმა ალექსანდრე ანქვაბმა გაიმარჯვა. მისი ე.წ. მთავრობის თავმჯდომარე, ლეონიდ ლაკერბაია კი, რომელსაც გამარჯვება გუშინ კონკურენტმაც კი ოფიციალურად მიულოცა, არც არჩეულების და არც არჩევნების მეორე ტურის კანდიდატებს შორის არ ფიგურირებს.

ხმების საკმარისი რაოდენობა ვერ დააგროვა ბაღაფშის დე ფაქტო მთავრობის საგარეო საქმეთა ექსმინისტრმა სერგეი შამბამ.

ოფიციალური თბილისი ე.წ. საპარლამენტო არჩევნებს არალეგიტიმურად აცხადებს. თავად ოკუპირებული რეგიონის ე.წ. ცენტრალური საარჩევნო კომისია კი მიიჩნევს, რომ ეს იყო კარგად ორგანიზებული და თანამედროვე სტანდარტებით ჩატარებული არჩევნები, რომელსაც ამომრჩეველთა 50% მონაწილეობდა.