ოკუპირებულ აფხაზეთში, დღეს, ე.წ. საპარლამენტო არჩევნების მეორე ტური იმართება.

12 მარტის არჩევნების შედეგად, 35 საარჩევნო ოლქიდან, გამარჯვებული კანდიდატები მხოლოდ 12-ში გამოვლინდნენ. დარჩენილ 22 ოლქში კი მაჟორიტარი კანდიდატების ვინაობა მეორე ტურის შედეგად გაირკვევა.

ოკუპირებულ აფხაზეთში მიმდინარე დე ფაქტო არჩევნებთან დაკავშირებით, 12 მარტს, საქართველოს საგარეო საქმეთა სამინისტრომ განცხადება გაავრცელა და საერთაშორისო თანამეგობრობას მიმართა, „ჯეროვნად შეაფასოს აფხაზეთის რეგიონში უკანონოდ ჩატარებული ე.წ. საპარლამენტო არჩევნები და მოუწოდებს რუსეთის ფედერაციას, პატივი სცეს საერთაშორისო სამართლის ფუნდამენტურ ნორმებსა და პრინციპებს."