ბრაზილიის ხელისუფლებამ ვადაგასული ხორცით ვაჭრობის მასშტაბური სქემა გაშიფრა.

„ბი-ბი-სის“ ინფორმაციით, ბრაზილიაში 30-ზე მეტი მაღალჩინოსანი გადააყენეს და ხორცის გადამამუშავებელი სამი ქარხანა დახურეს, კიდევ 20 საწარმო კი, ამჟამად მოწმდება.

გამოძიების ინფორმაციით, ორი მსხვილი კომპანიის - JBS-სა და BRF-ის მენეჯერები სანიტარულ ინსპექტორებს ქრთამს აძლევდნენ და პროდუქციაზე ყალბ სერტიფიკატებს იღებდნენ.

ბრაზილიის ფედერალურმა პოლიციამ განაცხადა, რომ ხორცთან დაკავშირებული მაქინაციების 40-მდე ფაქტი აქვთ დაფიქსირებული.

ირკვევა, რომ მწარმოებლები იყენებდნენ ქიმიკატებს, რათა ხორცის უხარისხობა დაემალათ.

JBS-სა და BRF-ში გამოძიების წარმოების შესახებ ინფორმაციას ადასტურებენ, თუმცა მაქინაციებში მონაწილეობას უარყოფენ.

ამერიკაში, ჩინეთსა და ევროკავშირის ქვეყნებში ხორცის ექსპორტიდან ბრაზილიას წელიწადში 12 მილიარდი დოლარის მოგება აქვს.

სწორედ ამიტომ, ბრაზილიური ხორცის სკანდალს გამოეხმაურა ქვეყნის პრეზიდენტი მიშელ ტიმერი, რომელმაც ქვეყანაში მყოფი უცხო ქვეყნების ელჩები სტეიკ ჰაუსში ვახშამზე მიიწვია. პრეზიდენტმა ამით აღნიშნა, რომ ბრაზილიის მიერ წარმოებული ხორცი ხარისხიანია და დარღვევები მხოლოდ ერთეულ შემთხვევებს წარმოადგენს.

ამის მიუხედავად, ვრცელდება ინფორმაცია, რომ ჩინეთის სახალხო რესპუბლიკამ უკვე შეაჩერა ბრაზილიიდან ხორცის მიღება.

ბრაზილიაში წარმოებული ხორცით, მსოფლიოს მრავალი ქვეყანასთან ერთად, მარაგდება საქართველოც.

როგორც საზოგადოებრივს სტატისტიკის ეროვნულ სამსახურში განუცხადეს, 2016 წელს ბრაზილიიდან 4,623 ათასი ტონა, 4,448 მლნ აშშ დოლარის ღირებულების ხორცი შემოვიდა (მათ შორის, ხორცი მსხვილფეხა რქოსანი პირუტყვის, გაყინული - 337.2 ტონა, ხორცი და კვების სუბპროდუქტები შინაური ფრინველის, ახალი, გაცივებული ან გაყინული - 4,286 ათასი ტონა), ხოლო, 2017 წელს (იანვარ-თებერვალში) - 545.8 ტონა, 413 ათასი აშშ დოლარის ღირებულების ხორცი (მათ შორის, ხორცი მსხვილფეხა რქოსანი პირუტყვის, გაყინული - 49.2 ტონა, ხორცი და კვების სუბპროდუქტები შინაური ფრინველის, ახალი, გაცივებული ან გაყინული - 496.6 ტონა).

საქართველოში შემოტანილი ბრაზილიური ხორცის შესახებ ვრცლად „მოამბის“ მთავარ გამოშვებაში, 20:00 საათზე გიამბობთ.