ფარული მიყურადების შესახებ კანონს, პოლიტიკური უთანხმოების ხანგრძლივი ისტორია აქვს.
კანონში შესულ ცვლილებებზე პრეზიდენტმა ვეტოს უფლება მესამედ გამოიყენა. დღევანდელი ვერსიით, ფარული საგამოძიებო მოქმედებების ჩატარების უფლება ექნება ახალ ოპერატიულ-ტექნიკურ სააგენტოს, რომელიც სუსს დაექვემდებარება. კონტროლს კი პარლამენტის ნდობის ჯგუფთან ერთად, პერსონალურ მონაცემთა დაცვის ინსპექტორი განახორციელებს.
ოპოზიციასთან ერთად, სწორედ სააგენტოს დამოუკიდებლობა აეჭვებს პრეზიდენტს.
შენიშვნები აქვს არასამთავრობო სექტორსაც, რომელიც ორგასაღებიანი სისტემის და დამოუკიდებელი სააგენტოს შექმნის მომხრე იყო.
მაქსიმალურად დაცული ბალანსი სახელმწიფო უსაფრთხოებასა და ადამიანის უფლებებს შორის - ასეთია მმართველი გუნდის მთავარი არგუმენტი.