ქართული მხარე ჟენევის მოლაპარაკებების მორიგი რაუნდისთვის ემზადება, რომელიც 28-29 მარტს შედგება.
დელეგაცია შვეიცარიაში უკვე გაემგზავრა. განსახილველ საკითხთა დღის წესრიგი ფართოა. ოფიციალური თბილისი ოკუპირებული ტერიტორიებიდან მოქალაქეების გატაცების ფაქტების, ეთნიკური ნიშნით დისკრიმინაციისა და დე ფაქტო აფხაზეთის ე.წ მთავრობის გადაწყვეტილებით, გადასასვლელი პუნქტების დახურვის თემებზე იმსჯელებს.
მოლაპარაკებების მორიგ რაუნდამდე, ქართული მხარე რუსეთის საგარეო უწყების განცხადებასაც ეხმაურება და მას პროვოკაციულს უწოდებს.
ოკუპირებულ ტერიტორიებზე ადამიანის უფლებათა დარღვევის ფაქტებზე გაერო-ს შესაბამისი ორგანოს მიერ, 24 მარტს მიღებული რეზოლუციის შემდეგ, ლავროვის უწყებამ დოკუმენტს პოლიტიზებული უწოდა, ქართული მხარე კი ჟენევის მოლაპარაკებათა მოახლოებული რაუნდის საბოტაჟის მცდელობაში დაადანაშაულა.