საკონსტიტუციო სასამართლოს პლენუმი საარჩევნო კოდექსის იმ მუხლების კონსტიტუციასთან შესაბამისობის საკითხზე მსჯელობს, რომლებიც საარჩევნო ოლქების შექმნის, ოლქებში მანდატების რაოდენობის დადგენისა და პარლამენტში პარტიებზე მანდატების გადანაწილების წესს არეგულირებს.
სარჩელი მოქალაქეებს თამარ პაპაშვილსა და ანა ბერიძეს ეკუთვნით. მოსარჩელის პოზიციით, სადავო ნორმა ვერ უზრუნველყოფს პარტიების მიერ მოპოვებული ხმების შესაბამისად მანდატების ადეკვატურ გადანაწილებას.
მოსარჩელის პოზიციების დამცველის ვახუშტი მენაბდის განცხადებით, მოქმედი წესის მიხედვით ის პარტია, რომელმაც რეალურად ამომრჩეველთა ხმების 49 პროცენტი მოიპოვა, შეიძლება მანდატების 80 პროცენტის მფლობელი გახდეს.
მისი შეფასებით, მანდატების რაოდენობა პროპორციული სისტემით მიღებული ხმების რაოდენობასთან მაქსიმალურად უნდა იყოს მიახლოებული.
სარჩელის არსებითი განხილვის პროცესზე მოწმის სტატუსით ექსპერტებიც არიან მოწვეული, რომლებიც ისაუბრებენ, რამდენად არის შესაბამისობაში მოქმედი ნორმა საერთაშორისო პრაქტიკასთან.