სამხრეთ ამერიკის ზონაში გუშინ მუნდიალის საკვალიფიკაციო ეტაპის მორიგი შეხვედრები გაიმართა. შეუჩერებელია ბრაზილიის ნაკრები. პენტაკამპეონებმა ამჯერად სან პაოლოში პარაგვაის ნაკრები დაამარცხეს.

"არენა კორინთიანსზე" გამართული მატჩი მასპინძელთა დომინაციით აღინიშნა. ბრაზილიამ ტაიმი,ფერნანდო კოუტინიოს გოლით 1-0 მოიგო. მეორე ნახევარში კი ტიტეს გუნდმა კიდევ ორჯერ აიღო მეტოქის კარი. 64-ე წუთზე ჯერ ნაიმარმა დაარტყა ზუსტად, ხოლო საბოლოო წერტილი 86-ეზე მარსელომ დასვა. 3-0 ბრაზილიელთა დამაჯერებელი გამარჯვება. ეს ამ გუნდის, ზედიზედ მერვე მოგება იყო. მსოფლიოს ხუთგზის ჩემპიონები 33 ქულით გათამაშებას დიდი უპირატესობით ლიდერობენ.

ბრაზილიისგან განსხვავებით, არადამაჯერებელია მიმდინარე საკვალიფიკაციო ეტაპზე, კიდევ ერთ გრანდი, არგენტინა. ბუაზას გუნდმა გუშინ ლა პასში ბოლივიასთან წააგო.

სტუმრებმა ლეო მესის გარეშე ითამაშეს. არგენტინელთა ლიდერს გასულ ტურში ჩილესთან მატჩის დროს ოთხმატჩიანი დისკვალიფიკაცია მისცეს. ამავე მიზეზით არ უთამაშია გონსალო იგუაინს, ხოლო სერხიო აგერო და პაოლო დიბალა მთავარმა მწვრთნელმა რატომღაც ძირითადში არ დააყენა. ამ ყველაფრით, ბოლივიელებმა კარგად ისარგებლეს და მეტოქეს ორი უპასუხო ბურთი გაუტანეს.

გოლების ავტორები არსე და მარტინსი არიან. აღსანიშნავია, რომ არგენტინის ეროვნული გუნდი ამ ეტაპზე მხოლოდ მეხუთე ადგილზეა და კიდევ სამი თამაშის ჩატარება მოუწევს მესის გარეშე. ალბისელესტე მორიგ ტურში პირველ სექტემბერს სტუმრად, ურუგვაის დაუპირისპირდება