საქართველოს ფინანსთა სამინისტროს საგამოძიებო სამსახურმა, სახელმწიფო უსაფრთხოების სამსახურის კონტრდაზვერვის დეპარტამენტთან ერთობლივად გატარებული საგამოძიებო და ოპერატიული მოქმედებების შედეგად,სატელეფონო კომუნიკაციების სფეროში ჩადენილი მორიგი, საერთაშორისო ორგანიზებული დანაშაულებრივი ფაქტი გახსნა. ამის შესახებ ინფორმაციას საგამოძიებო სამსახური ავრცელებს.

მათივე ცნობით, ჩატარებული გამოძიების შედეგად, ქალაქ თბილისში, სხდავასხვა ადგილებიდან ამოღებულია უკანონოდ განთავსებული, საერთაშორისო ზარის ადგილობრივ ზარად გარდაქმინისათვის განკუთვნილი, სამი ერთეული ელექტრონული მოწყობილობა - ე.წ. „სიმ ბოქსი“სათადარიგო ნაწილებთან ერთად, რაც უზრუნველყოფდატექნიკური აღჭურვილობის სრული დატვირთვით მუშაობას. დანაშაულებრივი ჯგუფის წევრები, უცხოური ზარის ადგილობრივ ზარად გარდაქმნის შედეგად, კანონსაწინააღმდეგოდ, ხელოვნურად ცვლიდნენ შემომავალი ზარების ტარიფებს და მნიშვნელოვნად აზარალებდნენ როგორც სახელმწიფო ბიუჯეტს, ასევე სატელეფონო კომუნიკაციების სფეროში მომუშავე კომპანიებს.

აღსანიშნავია, რომ საგამოძიებო სამსახურის მიერ გატარებული მაშტაბური საგამოძიებო მოქმედებების შედეგად უკვე გამოვლენილია 13 ერთეული სიმ ბოქსის უკანონოდ განთავსება - გამოყენების ფაქტი.

გამოძიება მიმდინარეობს საქართველოს სსკ 185-ე, 192-ე და 218 - ე მუხლით, რაც ითვალისწინებს 8-წლამდე თავისუფლების აღკვეთას.