ლევან იზორია: ტყვია- წამლის უკანონოდ გატანის საქმეზე დანაშაულის გამოვლენა ჩვენი ძალისხმევით გახდა შესაძლებელი

„კონკრეტული პირების ბარლეულობა კონკრეტული მტკიცებულებების საფუძველზე გამოვლინდა“- ასე გამოეხმაურა საქართველოს თავდაცვის მინისტრი ლევან იზორია სამხედრო პოლიციის დეპარტამენტის მიერ, სამსახურებრივი მდგომარეობის გამოყენებით, ვაზნების მართლსაწინააღმდეგო შეძენის, შენახვისა და გასაღების ფაქტზე სამი პირის დაკავებას. მინისტრის განმარტებით , საქმეში ამ ეტაპზე არსებული მტკიცებულებების მიხედვით, დაკავებულები უკანონოდ მოპოვებულ ვაზნებს პირადი მოხმარებისთვის, სამონადირეო დანიშნულებით აპირებდნენ გამოყენებას. „უნდა აღვნიშნო, რომ აქ საუბარია მხოლოდ ტყვია- წამალზე. ჩვენი კონტროლის მექანიზმი კი მართლაც უპრეცედენტოდ კარგია, აქვე მადლობა მინდა გადავუხადო სამხედრო პოლიციას ეფექტიანი მუშაობისთვის. სწორედ, ჩვენი ძალისხმევით გახდა შესაძლებელი ამ დანაშაულის გამოვლენა. იანვარში ჩვენ ჩავატარეთ ინვენტარიზაცია, ტყვია-წამლის ფაქტობრივი რაოდენობა დოკუმენტურად აღრიცხულთან შევადარეთ, აქ დარღვევა არ გამოვლენილა. შემდგომში მიღებული ოპერატიული ინფორმაციის საფუძველზე განვახორციელეთ ოპერატიულ-საგამოძიებო მოქმედებები. საუბარია 2018 წლის 9 აგვისტოდან 9 სექტემბრის ჩათლით პერიოდზე. სწორედ ამ პერიოდში მოხდა კონკრეტული მტკიცებულებების საფუძველზე დამნაშავეთა გამოვლენა. მე მოვისმინე სხვადასხვა ექსპერტის შეფასებები, თითქოს ტყვია- წამალი იყიდებოდა შავ ბაზარზე, თითქოს სახელმწიფო უსაფრთხოებას დაემუქრა საფრთხე. ამ ეტაპზე მოპოვებული მტკიცებულებებით ასეთი საფრთხე გამოირიცხება. პიროვნებას, ვისაც ეს ტყვია-წამალი დანაშაულებრივი გზით გაჰქონდა, მონადირის იარაღები ჰქონდა. ბალისტიკურმა ექსპერტიზამ დაამტკიცა, რომ M4 -ის ტიპის ვაზნები ადეკვატურია იმ სანადირო იარაღების, რომლებიც მას გააჩნდა და იმ პიროვნებას, ვისაც ეს ტყვია-წამალი გადასცა. ეს დაამტკიცა არა იზორიამ, არამედ ბალისტიკურმა ექსპერტიზამ. ჩვენ გარკვეული პერიოდის განმავლობაში, ვფლობდით რა ოპერატიულ ინფორმაციას, ვაკვირდებოდით და კონკრეტული მტკიცებულების საფუძველზე მოსამართლის განჩინებით ჩავატარეთ რა ჩხრეკა, ამოვიღეთ სწორედ 6750-მდე ვაზნა. რაც შეეხება გაშუქებას, მოგეხსენებათ, მითუფრო ისეთი ტიპის დანაშაულის გამოძიება, როცა არსებობს კითხვები სახელმწიფო უსაფრთხოებასთან დაკავშირებით, ითხოვს რაც შეიძლება მეტი ინფორმაციის მოპოვებას. საგამოძიებო ორგანოებს ჰქონდათ სურვილი, რომ ეს ჯერ არ გასაჯაროებულიყო. ჩვენ ეს სურვილი გავითვალისწინეთ, ხოლო როდესაც კვირის დასაწყისში გამოიკვეთა, რომ არ არსებობდა მტკიცებულება, რომელიც ამ ეტაპზე თვალსაჩინოს ხდიდა სახელმწიფოსთვის საფრთხეებს, ამ ინფორმაციის გასაჯაროება გადავწყვიტეთ. მით უფრო, ორ-სამ კვირაში დაიწყება საქმის არსებითი განხილვა. ჩვენ ყველა ეტაპზე ვიმოქმედეთ საგამოძიებო ინტერესებიდან გამომდინარე, რათა მაქსიმალურად მიგვეღო ობიექტური ინფორმაცია, მაქსიმალურად აგვეცილებინა საფრთხე სახელმწიფოსთვის, ხომ არ არსებობდა გარკვეული გარემოებები, რომლებიც საფრთხეზე მეტყველებდნენ. ამ ეტაპზე მსგავსი არაფერი იკვეთება. ჩანს, რომ მიზანი მათი პირადი ინტერესები იყო, კერძოდ თავიანთი სამონადირეო საქმიანობის განსახორციელებლად. სხვა მესამე პირზე გაყიდვის ფაქტი ამ ეტაპზე ჩვენი მტკიცებულებების საფუძველზე არ იკვეთება. გამოძიება გრძელდება და თუ გარკვეული დანაშაულებრივი გარემოებები კიდევ გამოიკვეთა, მოგაწვდით ინფორმაციას. არავის არავითარი ინტერესი არ აქვს ვიღაცას ტყვია წამალი ჩაუდოს. რა ინტერესი უნდა ჰქონოდა ვინმეს, თუნდაც თავდაცვის უწყებაში? ერთადერთი მიზანი იყო მყარ მტკიცებულებებზე დაყრდნობით გვემოქმედა, გვქონდა ოპერატიული ინფორმაცია რაც გამართლდა შემდგომ ოპერატიულ-საგამოძიებო მოქმედებებით“-განაცხადა ლევან იზორიამ. თავდაცვის მინისტრმა ჟურანლისტებთან ინვეტარიზაციის პროცესზეც ისაუბრა: „ ინვეტარიზაცია პერიოდულად წელიწადში ერთხელ ან ორჯერ იმართება. ამ კონკრეტული ფაქტის საფუძველზე ვატარებთ ახალ ინვეტარიზაციას, შედეგად შესაძლოა გამოვლინდეს დისციპლინური პასუხისმგებლობის საკითხი და რეაგირებაც შესაბამისი გვექნება“-განაცხადა თავდაცვის მინისტრმა.