ენერგეტიკის მინისტრი, ვიცე-პრემიერი კახი კალაძე მიიჩნევს, რომ პრეზიდენტ გიორგი მარგველაშვილის გამოსვლაში სიახლე არაფერი არ იყო.
როგორც კახი კალაძემ ჟურნალისტებს განუცხადა, მოლოდინი ჰქონდა, რომ პრეზიდენტი უფრო მომზადებული იქნებოდა.
„სიახლე არაფერი იყო, რასაც ყოველთვის ამბობს, ის მოვისმინეთ, თუმცა ვფიქრობდი, რომ ვინაიდან, პრეზიდენტი პარლამენტში მობრძანდებოდა, სადაც პრემიერ-მინისტრი, მთავრობა და დიპლომატიური კორპუსი იქნებოდნენ, ის უფრო მომზადებული იქნებოდა, თემებს უფრო ჩაუღმავდებოდა და უფრო ობიექტური იქნებოდა, მაგრამ განსხვავებული გამოსვლა მოვისმინეთ, რაც მისი გადასაწყვეტი იყო“, - აღნიშნა კახი კალაძემ.
მისივე თქმით, საკონსტიტუციო კომისიის მუშაობაზე პრეზიდენტის პრეტენზიები გაუგებარია.
„გაუგებარია რას გულისხმობდა პრეზიდენტი, როდესაც ამბობდა, რომ უმრავლესობა საკუთარ თავშია ჩაკეტილი. ის თუ საუბრობს საკონსტიტუციო კომისიაზე, რომელსაც ძალიან ხშირად აკრიტიკებს, ნამდვილად მიუღებელი იქნება და მას არანაირი არგუმენტი არ აქვს, რადგან საკონსტიტუციო კომისია, რომელიც რამოდენიმე თვის განმავლობაში მუშაობს, კომისიის მუშაობა არის საკმაოდ მასშტაბური. მის სამ წარმომადგენელსაც ჰქონდა შეთავაზება, რომ ჩართულიყვნენ პროცესში, მაგრამ ბოიკოტი გამოუცხადეს. ბოიკოტის გამომცხადებელი პოლიტიკოსები როგორ ამთავრებენ ჩვენ კარგად გვახსოვს წინა ხელისუფლებიდან გამომდინარე“, - განაცხადა კახი კალაძემ.
მისივე თქმით, საკონსტიტუციო კომისიაში ჩართულები არიან სპეციალისტები, არასამთავრობო ორგანიზაციის წარმომადგენლები და პოლიტიკური პარტიების წარმომადგენლები.
„პრეზიდენტის პიარ-კამპანია, რომ საკონსტიტუციო კომისიის მუშაობაში ყველა იყოს ჩართული, ეს არის გამოყენებული მხოლოდ ერთი მიზნისთვის და ეს მიზანი ემსახურება დაფიქსირებას საქართველოში, როგორც დამოუკიდებელ პოლიტიკურ მოთამაშედ. ეს არის მხოლოდ და მხოლოდ პოპულისტური მიზნები. თუ მას აქვს სურვილი კონსტიტუციაში მოხდეს გარკვეული ცვლილებები ის, როგორც მას თვითონ აქვს ხედვა, არსებობს ამისთვის კომისია, ყავს მას სამი წარმომადგენელი ამ კომისიაში და დასხდნენ და განიხილონ. რეალურად მათ ამის სურვილი არ აქვთ“, - აღნიშნა კალაძემ.