ფონიჭალაში დედა-შვილის მკვლელობაში ბრალდებულმა გიორგი ხაბელაშვილმა საქალაქო სასამართლოში ნაფიცი მსაჯულების თანდასწრებით დღეს ჩვენება მისცა.

ხაბელაშვილის თქმით, დაკავების დროს მის მიერ გაჟღერებული ინფორმაცია სიმართლეს არ შეესაბამება, რადგან მას აღიარებითი ჩვენება იძულებით მიაცემინეს. ბრალდებული აცხადებს, რომ მასზე ფიზიკური ზეწოლა დაკავებისასაც განხორციელდა.

რაც შეეხება უშუალოდ მკვლელობის დეტალებს, პროკურორის თქმით, ექსპერტიზამ დაამტკიცა, რომ მკვლელობის იარაღზე ხაბელაშვილის დნმ-ის კვალია, რასაც ბრალდებული უარყოფს, მისი ადვოკატი კი ამბობს, რომ ექსპერტიზა კანონდარღვევით ჩატარდა.

კიდევ ერთი დეტალი ეხება ოქროულობას, რომელიც, გამოძიების ინფორმაციით, ხაბელაშვილმა ლომბარდში ჩააბარა და ის გარდაცვლილ ნონა რომანაძეს ეკუთვნოდა. ჩვენებაში ხაბელაშვილმა თქვა, რომ ძვირფასეულობა მისი დის იყო.

შეგახსენებთ, ზემო ფონიჭალაში დედა-შვილი გასული წლის თებერვალში მოკლეს. ნონა რომანაძეს 24 ჭრილობა ჰქონდა მიყენებული.

გამოძიების ინფორმაციით, ბრალდებულმა კვალის დაფარვის მიზნით, საცხოვრებელ სახლს ცეცხილი წაუკიდა. ის 5 თვის შემდეგ დააკავეს. საქმეს ნაფიცი მსაჯულები განიხილავენ, რომლებიც უახლოეს დღეებში ვერდიქტს გამოაცხადებენ.