საკალათბურთო ევროლიგის გათამაშებაში ოთხთა ფინალის მონაწილე ორი გუნდი უკვე გამოვლინდა. სტამბოლის "ფენერბახჩეს", მოსკოვის "ცეესკა"ც შეუერთდა.

არმიელებმა სერია 3-0 მოუგეს თორნიკე შენგელიას "ბასკონიას". მესამე დაპირისპირება გუშინ ესპანეთში შედგა და საკმაოდ საინტერესოდ განვითარდა.

აღსანიშნავია, რომ ქართველი კალათბურთელი 19 ქულით და 7 მოხსნით თავის გუნდში საუკეთესო გახლდათ. შეხვედრაში ყველაფერი ბოლო წამებზე გადაწყდა. მასპინძლებს თამაშის მოგებაც შეეძლოთ, თუმცა ადამ ჰანგას ნატყორცნ სამქულიანს ნიკიტა კურბანოვმა დააფარა და საბოლოოდ არმიულმა კლუბმა 90-88 გაიმარჯვა.

ევროლიგის მოქმედი ჩემპიონი კვლავ საუკეთესო ოთხეულში მოხვდა. დღეს ამ ტურნირზე მეოთხედფინალის დარჩენილი ორი თამაში ჩატარდება. "ეფესი" სტამბოლში "ოლიმპიაკოსს" უმასპინძლებს, ხოლო კიდევ ერთი თურქული გუნდი "დარუშაფაკა" მადირიდს "რეალს" მიიღებს.

შეგახსენებთ, რომ ორივე სერიაში საერთო ანგარიში 1-1-ია