სერბეთის ქალაქ ნოვი სადში მიმდინარე ევროპის ჩემპიონატზე, საქართველოს თავისუფალი სტილით მოჭიდავეთა ნაკრებს, დღეს, ორი მედლის მოპოვების შანსი აქვს.
ბრინჯაოზე ზურაბ იაკობაშვილი და ელიზბარ ოდიკაძე იჭიდავებენ. 65 კილოგრამ წონით კატეგორიაში მოასპარეზე იაკობაშვილი გადამწყვეტ დაპირისპირებაში აზერბაიჯანელ მაგომედ გაჯიევს შეხვდება, ხოლო 97 კილოგრამში ოდიკაძის მეტოქე მაკედონიის სახელით მოასპარეზე მაგომედგაჯი ნუროვი იქნება. ფინალური ბლოკი თბილისის დროით 21 საათზე დაიწყება.
შეგახსენებთ, რომ გუშინ, ბრინჯაოს მედლის მოპოვების შანსი ჰქონდა დათო მარსაგიშვილს, თუმცა ქართველი ფალავანი უნგრელ მეტოქესთან დამარცხდა. მიმდინარე ევროპირველობაზე, ხვალ, საქართველოს ღირსებას ოლიმპიადის, მსოფლიოს და ევროპის ჩემპიონი ვლადიმერ ხინჩეგაშვილი და ავთანდილ კენჭაძე დაიცავენ. ბოლო დღეს კი ტატამზე დავით ტლაშაძე და გენო პეტრიაშვილი გავლენ.