პარიზში, მსოფლიო ჩემპიონატზე ასპარეზობის შემდეგ, საქართველოს თავისუფალი სტილით მოჭიდავეთა ნაკრების წევრები სამშობლოში დაბრუნდნენ. მოჭიდავეებს თბილისის აეროპორტში გულშემატკივრები დახვდნენ.

„ძალიან გახარებული და ბედნიერი ვარ, რომ შევძელი და მივაღწიე იმ შედეგს, რომ მსოფლიო ჩემპიონი გავხდი. მადლობას ვუხდი ჩემს მწვრთნელებს, ჭიდაობის ფედერაციას, რომ ყველანაირად ხელი შეგვიწყვეს და გავახარეთ ჩვენი გულშემატკივარი“, - განუცხადა ჟურნალისტებს მსოფლიო ჩემპიონმა 65 კგ წონით კატეგორიაში ზურაბ იაკობაშვილმა.

მძიმე წონით კატეგორიაში მოასპარეზე გენო პეტრიაშვილის თქმით, საკმაოდ რთული შეხვედრა იყო.

„ჩემს მოწინააღმდეგეს მეხუთედ შევხვდი, მას ბევრჯერ აქვს მსოფლიო ჩემპიონობა მოგებული, მეც მინდოდა გამხდარიყავი მსოფლიო ჩემპიონი და განწყობილი წავედი მოსაგებად. მადლობას ვუხდი ჩემს გულშემატკივარს“ - განაცხადა პეტრიაშვილმა.

თავისუფალი სტილით მოჭიდავეთა მსოფლი ჩემპიონატი 21-26 აგვისტოს პარიზში გაიმართა. ქართველმა სპორტსმენებმა ორი ოქროსა და ერთი ბრინჯაოს მედალი მოიპოვეს. ჩემპიონატის ბოლო დღეს 65 კგ წონით კატეგორიაში მოასპარეზე ზურაბ იაკობაშვილი მსოფლიო ჩემპიონი გახდა, ფინალში მან პოლონეთის სახელით მოასპარეზე ოსი წარმოშობის მაგომედმურად გაჯიევი დაამარცხა. 25 აგვისტოს კი, დამოუკიდებელი საქართველოს ისტორიაში პირველად, მძიმე წონის - 125 კგ კატეგორიაში მოასპარეზე გენო პეტრიაშვილმა თურქი მოწინააღმდეგე დაამარცხა და მსოფლიო ჩემპიონი გახდა. ხოლო ვლადიმერ ხინჩეგაშვილმა ბრინჯაოს მედალი მოიპოვა.

საქართველოს თავისუფალი სტილით მოჭიდავეთა ნაკრები მსოფლიო ჩემპიონატის გუნდურ ჩათვლაში მესამე ადგილზე გავიდა. გუნდურ ჩათვლაში ჩემპიონი ამერიკის შეერთებული შტატების ნაკრები გახდა. მეორეადგილოსანი რუსეთის გუნდია.