შეცდომას დავარქმევდი იმას, რომ წმინდა სინოდმა არ განიხილა დეკანოზ გიორგი მამალაძის წერილი, - ეს განცხადება ჟურნალისტებთან საუბრისას ჭყონდიდის მიტროპოლიტმა პეტრემ გააკეთა.

„წერილი ძალიან საინტერესო შინაარსისაა. რაც შეეხება იმას, რატომ არ განიხილა სინოდმა, მე დავარქმევდი ამას შეცდომას, ისევე, როგორც შეცდომა იყო სრული ნდობის გამოცხადება პროკურატურისათვის, ისევე, როგორც შეცდომა იყო ზოგადად ხელისუფლებისგანაც და ეკლესიისგანაც ამ სპეცოპერაციაში თანამონაწილეობა. სანამ ამ შეცდომას არ ვაღიარებთ ჩვენ და ისევ შეცდომით გავაგრძელებთ არსებული კრიზისიდან გამოსვლას, ვფიქრობ, რომ შეიძლება უარესი შედეგი მივიღოთ“, - აღნიშნა მეუფე პეტრემ.

მისივე თქმით, დეკანოზ გიორგი მამალაძის ადვოკატებმა ბრალდებულის წერილი მას წმინდა სინოდის სხდომის წინა დღეს, 8 მარტს გადასცეს.

მეუფე პეტრეს განცხადებით, სინოდის სხდომა ისე დასრულდა, რომ წერილთან დაკავშირებით ინტერესი არავის გამოუხატავს, ურბნისისა და რუისის მიტროპოლიტ იობის გარდა, რომელმაც, მისი თქმით, რეპლიკის დონეზე გამოხატა წერილის მიმართ ინტერესი. მისივე თქმით, წერილის შესახებ მისთვის არაფერი უკითხავს ბათუმისა და ლაზეთის მიტროპოლიტ დემეტრეს.

„მეუფეს ჩემთვის ეს შეკითხვა არ დაუსვამს, ჩემდა გასაკვირად და მეც არ ჩავთვალე საჭიროდ, რომ თავს მომეხვია მისთვის ინტერესი და შინაარსი ამ წერილისა, რამეთუ მას შეეძლო, თავად ადვოკატებს შეხვედროდა და მოესმინა მათი პირითვე ის, რაც წერილში წერია“, - აღნიშნა მეუფე პეტრემ.

ჭყონდიდის მიტროპოლიტის განცხადებით, მან საჭიროდ ჩათვალა, რამდენიმე დღის წინ ტელეეთერით გაეჟღერებინა წერილის შინაარსი. მისივე თქმით, აღნიშნული წერილის რამდენიმე ასლს სხვადასხვა ადგილას ინახავს.

„რადგან ასეთი დიდი ინტერესი გამოიწვია ამ წერილის ტექსტმა, დავაკოპირე რამდენიმე ეგზემპლარი და სხვადასხვა ადგილზე შევინახე, რომ არ გაქრეს ეს წერილი, დავიზღვიე თავი“, - აღნიშნა მეუფე პეტრემ.

შეგახსენებთ, მეუფე პეტრემ დეკანოზ გიორგი მამალაძის მიერ ციხიდან გამოგზავნილი წერილის შესახებ განცხადება გადაცემა „რეაქციაში“ გააკეთა.

ჭყონდიდის მიტროპოლიტის ინფორმაციით, პროკურატურა დეკანოზ გიორგი მამალაძეს გარკვეული პირობით გათავისუფლებას ჰპირდებოდა.

მისი განმარტებით, გათავისუფლების სანაცვლოდ, ბრალდებულს პატრიარქის ძმის შვილი მეუფე დიმიტრი და ილია მეორის დაცვის ყოფილი უფროსი სოსო ოხანაშვილი დანაშაულის მონაწილეებად უნდა დაესახელებინა.

ბრალდებულ გიორგი მამალაძის ადვოკატებმა მოგვიანებით საზოგადოებრივს დაუდასტურეს, რომ პროკურატურამ დეკანოზს თანამშრომლობის სანაცვლოდ, გარკვეული შეღავათები შესთავაზა. რაც შეეხება წერილს, მიხეილ რამიშვილის თქმით, მას დაზუსტებით არ ახსოვს, სინოდის მისამართით გააგზავნა თუ არა წერილი მისი დაცვის ქვეშ მყოფმა, სადაც საუბარი სწორედ პროკურატურის შეთავაზებას ეხებოდა, რადგან ციხიდან გატანილი წერილების შინაარსს არასდროს ეცნობა.