სტრასბურგის ადამიანის უფლებათა დაცვის სასამართლოს მოსამართლე ნონა წოწორია განცხადებას ავრცელებს, სადაც აღნიშნავს, რომ მისი ძმის, ოთარ წოწორიას სახლში ჩატარებული ჩხრეკა სავარაუდოდ, მის საქმიანობას უკავშირდება. განცხადებაში, რომელიც ნონა წოწორიამ „ფეისბუქ“ გვერდზე გამოაქვეყნა, ნათქვამია, რომ ოთარ წოწორიას სახლში ამოღებული პისტოლეტი და ვაზნები არ წარმოადგენენ მისი ძმის ან ოჯახის რომელიმე სხვა წევრის საკუთრებას.

„მსურს განვაცხადო, რომ ვერაფერი მოახდენს გავლენას ჩემს მიერ სამოსამართლეო ფუნქციების განხორციელებაზე და კვლავაც შევიტან წვლილს საქართველოში დემოკრატიის და ადამიანის უფლებების განმტკიცების საქმეში“,- აღნიშნავს მოსამართლე.

„მაღალი საზოგადოებრივი ინტერესის გათვალისწინებით, ა.წ. 18 მაისს განვითარებულ მოვლენებთან დაკავშირებით თავს ვალდებულად მივიჩნევ განვაცხადო შემდეგი:

18 მაისს, დაახლოებით 19 საათზე, კრიმინალური პოლიციის თანამშრომლებმა ჩხრეკა ჩაატარეს ქ. ბათუმში ჩემი ოჯახის კუთვნილ სახლში, სადაც ცხოვრობენ ჩემი ძმა, რძალი და ძმისშვილები. შინაგან საქმეთა სამინისტროს განცხადებით, ამოღებულია პისტოლეტი და ვაზნები. ამ ნივთების წარმომავლობა ჩვენთვის უცნობია და შესაბამისად, ისინი არ წარმოადგენენ ჩემი ძმის ან ჩემი ოჯახის რომელიმე სხვა წევრის საკუთრებას. აქვე აღვნიშნავ, რომ ჩემს ძმას არასდროს ჰქონია კანონთან რამე პრობლემა და არ არის ნასამართლევი. ჩემი ოჯახისთვის თავისუფლება, პატიოსნება, შრომისმოყვარეობა და კანონმორჩილება ყოველთვის იყო, არის და იქნება მთავარი ღირებულებები.

მაქვს საფუძველი ვიფიქრო, რომ აღნიშნული ქმედებები უკავშირდება ჩემს საქმიანობას ადამიანის უფლებათა და თავისუფლებათა დაცვის ევროპულ სასამართლოში. მსურს განვაცხადო, რომ ვერაფერი მოახდენს გავლენას ჩემს მიერ სამოსამართლეო ფუნქციების განხორციელებაზე და კვლავაც შევიტან წვლილს საქართველოში დემოკრატიის და ადამიანის უფლებების განმტკიცების საქმეში“, - ნათქვამია განცხადებაში.

შსს-ს ინფორმაციით, ოთარ წოწორიას ბინაში ჩხრეკა 18 მაისს, ოპერატიული ინფორმაციის საფუძველზე, ჩატარდა.

უწყების ცნობით, ამოღებულია პისტოლეტი და სხვადასხვა კალიბრის ვაზნები. გამოძიება სსკ-ის 236-ე მუხლით მიმდინარეობს.