ამერიკის პრეზიდენტი დონალდ ტრამპი ორდღიანი სახელმწიფო ვიზიტით ისრაელში ჩავიდა. მას აეროპორტში ისრაელის პრემიერ-მინისტრი ბენიამინ ნეთანიაჰუ და ისრაელის პრეზიდენტი რეუვენ რივლინი დახვდნენ.
აეროპორტში სიტყვით გამოსვლისას დონალდ ტრამპმა განაცხადა, რომ ისრაელში ორ ქვეყანას შორის ურყევი კავშირების დასადასტურებლად ჩავიდა.
სიტყვით გამოსვლისას, ამერიკის პრეზიდენტმა აღნიშნა, რომ ერთად მუშაობით რეგიონში სტაბილურობის მიღწევა შესაძლებელია.
ისრაელის პრემიერ-მინისტრმა ბენიამინ ნეთანიაჰუმ აშშ-ის პრეზიდენტის ვიზიტს ისტორიული უწოდა. ტრამპი ისრაელის პრემიერ-მინისტრ ბენიამინ ნეთანიაჰუსთან შეხვედრის შემდეგ, მოლაპარაკებას პალესტინის ავტონომიის ლიდერ მაჰმუდ აბასთან გამართავს.
ოფიციალური შეხვედრების გარდა, დონალდ ტრამპი წმინდა ადგილებსაც მოინახულებს. ახლო აღმოსავლეთის შემდეგ, დონალდ ტრამპი ვატიკანს, ბრიუსელსა და სიცილიას ეწვევა.