ნატო-ს საპარლამენტო ასამბლეის წარმომადგენლები, სესიის ფარგლებში, საქართველოს ხელისუფლების წარმომადგენლებთან ერთად, ოკუპირებული ახალგორის მოსაზღვრე სოფელ ოძისში ჩავიდნენ.
უცხოელ დიპლომატებს ადგილზე არსებულ ვითარებას შინაგან საქმეთა სამინისტროს ანალიტიკური დეპარტამენტი აცნობდა.
ყურადღება გამახვილდა იმ საფრთხეებზე, რომელიც რეგიონში რუსული სამხედრო ძალების ყოფნის დროს რჩება. ისაუბრეს პრობლემებზე, რომელიც ადგილობრივ მოსახლეობას გადაადგილების დროს ექმნება.
ნატო-ს საპარლამენტო ასამბლეის წარმომადგენლებთან საგარეო პოლიტიკის, თავდაცვისა და უსაფრთხოების საკითხებიც განიხილეს, იმსჯელეს ოკუპირებული რეგიონებისთვის გამიზნულ სტრატეგიასა და რუსეთის სამხედრო მოდერნიზაციაზე - ყველა აღნიშნულ საკითხზე საგაზაფხულო სესიის ფარგლებში იმსჯელებენ.
როგორც ცნობილია, ნატო-ს არაწევრ ქვეყნებში საპარლამენტო ასამბლეა იშვიათად ჩადის და ეს პოლიტიკური მხარდაჭერის მაჩვენებელია.
ნატო-ს საპარლამენტო ასამბლეის მეორე დღე თბილისში ოფიციალირად გაიხსნა. ამ წუთებში ერთმანეთის პარალელურად 3 საკომიტეტო მოსმენა მიმდინარეობს, ესენია თავდაცვისა და უსაფრთხოების, ეკონომიკისა და უსაფრთხოების და მეცნიერებისა და ტექნოლოგიების კომიტეტები.
თავდაცვის მინისტრი ასამბლეაზე მოხსენებით გამოვიდა, თემა საქართველოს მოკლე და გრძელვადიანი თავდაცვის პრიორიტეტებია.
თბილისში ჩრდილოატლანტიკური ალიანსის საპარლამენტო ასამბლეის საგაზაფხულო სესია საქართველოს დამოუკიდებლობის დღეს გაიხსნა.