ნატო-ს საპარლამენტო ასამბლეის თავმჯდომარე, დელეგატებთან ერთად, ოკუპირებული ახალგორის მოსაზღვრე სოფელ ოძისს ესტუმრა.
სახელმწიფო უსაფრთხოების სამსახურის ანალიტიკური დეპარტამენტის წარმომადგენლები უცხოელ სტუმრებს ადგილზე არსებულ ვითარებას აცნობენ და დაფიქსირებული დარღვევების შესახებ ინფორმაციას აწვდიან.
ადგილზე ყურადღება გამახვილდა ე.წ. საზღვრის უკანონოდ გავლებაზე, მოქალაქეების უკანონოდ დაკავებასა და თავისუფალი გადაადგილების შეზღუდვაზე.
საქართველოს ოკუპირებულ რეგიონში ეს ნატო-ს დელეგაციის პირველი ვიზიტი არ არის. 27 მაისს, ალიანსის ასამბლეის წარმომადგენლები, სესიის ფარგლებში, საქართველოს ხელისუფლების წარმომადგენლებთან ერთად, ოკუპირებული ახალგორის მოსაზღვრე სოფელ ოძისში ჩავიდნენ.
თბილისში ჩრდილოატლანტიკური ალიანსის საპარლამენტო ასამბლეის საგაზაფხულო სესია საქართველოს დამოუკიდებლობის დღეს გაიხსნა.
როგორც ცნობილია, ნატო-ს არაწევრ ქვეყნებში საპარლამენტო ასამბლეა იშვიათად ჩადის და ეს პოლიტიკური მხარდაჭერის მაჩვენებელია.