გამოძიება იქნება სირთულეებით აღსავსე, მაგრამ წინ უნდა წავიდეს და მაქსიმალურად სწრაფად, ეფექტიანად დადგინდეს, რა მოხდა, - ამის შესახებ იუსტიციის მინისტრმა თეა წულუკიანმა აზერბაიჯანელი ჟურნალისტის, აფგან მუხტარლის საქმესთან დაკავშირებით, საზოგადოებრივი მაუწყებლის ეთერში, გადაცემა „მთავარში“ განაცხადა.

როგორც წულუკიანმა აღნიშნა, საქმე ეხება ქვეყნის პრესტიჟსა და სამართალდამცველების რეპუტაციას, როგორ სწრაფად გამოიძიებენ ამ კომპლექსურ და რთულ საქმეს.

მისივე თქმით, მოსაფიქრებელი იქნება პრევენციული მექანიზმი, რომ აზერბაიჯანის თუ სხვა ქვეყნის მოქალაქე საქართველოში ყოფნისას მსგავს ვითარებაში არ აღმოჩნდეს.

თეა წულუკიანის აზრით, კარგი იქნება, თუ თავს შეიკავებენ იმის მტკიცებისგან, რომ მომხდარში რომელიმე ქართველი ოფიციალური პირი შეიძლება იყოს გარეული, ვინაიდან, მინისტრის შეფასებით, ეს შეურაცხმყოფელია.

როგორც იუსტიციის მინისტრი ამბობს, ის ფაქტი, რომ აფგან მუხტარლი სხვა ქვეყანაში იმყოფება, საქმის გამოძიებას გაართულებს.

„საგამოძიებო პროცესი ყოველგვარი დახანების გარეშე დაიწყო. ის, რომ ეს ადამიანი არის უკვე სხვა ქვეყანაში, გაართულებს გამოძიებას. ის ძვირფასი ინფორმაცია, რაც გამოძიებას შეიძლება დასჭირდეს, მხოლოდ აფგანმა იცის, რომელიც ბაქოშია. ანუ - ვინ იყვნენ ეს ადამიანები, რომლებმაც, როგორც მისი ადვოკატი გვატყობინებს, ჩასვეს მანქანაში და სცემეს კიდეც, გააქანეს საზღვირსკენ. ვინ იყვნენ, თუ იცნობდა მათ, რა აკავშირებდა მათთან, რა ენაზე საუბრობდნენ“, - განაცხადა თეა წულუკიანმა.

როგორც იუსტიციის მინისტრმა აღნიშნა, აფგან მუხტარლის ამბავი თავად და მინისტრთა კაბინეტის სხვა წევრებმა 30 მაისს, დღის მეორე ნახევარში შეიტყვეს.

„უშუალოდ ეს ფაქტი არის ძალიან უსიამოვნო. სამართლებრივ ენაზე რაც ირკვევა, ამ ეტაპზე ალბათ უნდა დაკვალიფიცირდეს დანაშაულად. სწორედ ამ ვარაუდის გამო დაიწყეს ჩვენი ქვეყნის საგამოძიებო ორგანოებმა გამოძიება თავისუფლების უკანონოდ აღკვეთის მუხლით, თუმცა გამოძიების პროცესში შესაძლოა, სხვა მუხლებიც შემოვიდეს გამოყენების სფეროში“, - განაცხადა თეა წულუკიანმა.

აფგან მუხტარლი თბილისში 29 მაისს, საღამოს გაუჩინარდა. მოგვიანებით, გაირკვა, რომ ის ბაქოში, სახელმწიფო საზღვრის სამსახურის საგამოძიებო განყოფილებაში იმყოფებოდა.

მუხტარლის ბრალი აზერბაიჯანის სისხლის სამართლის კოდექსის 318-ე (საზღვრის უკანონო კვეთა) და 206-ე (დეკლარაციის გარეშე დიდი ოდენობით თანხის გადატანა) მუხლებით აქვს წარდგენილი.

აზერბაიჯანელ ჟურნალისტს აზერბაიჯანულმა სასამართლომ სამთვიანი წინასწარი პატიმრობა შეეფარდა.