პრეზიდენტის ადმინისტრაცია საკონსტიტუციო ცვლილებებზე კონსენსუსის რესურსის ძიებისთვის შეხვედრებს გააგრძელებს,- ეს განცხადება პრეზიდენტის ადმინისტრაციის უფროსმა გიორგი აბაშიშვილმა არასამთავრობო სექტორთან გამართული შეხვედრის შემდეგ გააკეთა.
აბაშიშვილის თქმით, ძალიან სამწუხაროა, რომ საკონსტიტუციო კომისიამ მუშაობა ისე დაასრულა, რომ კონსტიტუციურ პროექტთან დაკავშირებით ვერანაირი კონსესუსი მიღწეული ვერ იქნა.
„პრაქტიკულად კონსტიტუციური პროექტის მიღება ნულოვანი კონსენსუსით მოხდა. შესაბამისად, დემოკრატიული ჩართულობის მიმართულებით ეს ურთულესი პროცესია. საქართველოს პრეზიდენტი ყოველთვის პროცესის გახსნილობას და ამ პროცესში საზოგადოების მეტ ჩართულობას ემხრობოდა. თუმცა, ეს სამწუხაროდ ამ დრომდე ვერ მოხერხდა. სწორედ ამიტომ პრეზდენტის დავალებით სახალხო განხილვების "კონსტიტუცია ყველასიას" ორგანიზების შემდეგ, შეხვედრები არასამთავრობო ორგანიზაციებთან დავიწყეთ“,- აღნიშნა აბაშიშვილმა.
მისივე თქმით, ახლო მომავალში შეხვდებაინ უსაფრთხოების სფეროს ექსპერტებს, პოლიტიკურ პარტიებსა და სახალხო დამცველს, რათა გამოიკვეთოს ის ძირითადი საკითხები, რომლებზეც ჯერ კიდევ რესურსი კონსენსუსის მისაღწევად არსებობს.
„უამრავი თემაა, რაზეც სამწუხაროდ, ხელისუფების გარდა თითქოს ჩანს, რომ არასამთავრობო სექტორიც, ექსპერტებიც და პოლიტიკური პარტიებიც გარკვეულწილად თანხმდებიან. ეს საარჩევნო სისტემას, პრეზიდენტის არჩევის წესს, სასამართლო პროცესს და უსაფრთხოებას შეეხება. ამ შეხვედრების უმთავრესი მიზანი ამ კონსენსუსის რესურსის ძიება, რა შეიძლება იქნას მიღწეული იმისათვის, რომ ჩვენ რეალურად არ მივიღოთ კონსტიტუციის პროექტი, როგორიც ახალა გვაქვს, ანუ მხოლოდ ერთი პარტიის მიერ ნულოვანი კონსენსუსის შედეგად ჩამოყალიბებული", - განაცხადა გიორგი აბაშიშვილმა.