პრეზიდენტის ადმინისტრაციის უფროსის, გიორგი აბაშიშვილის განცხადებით, პრეზიდენტმა ჯერ კიდევ პირველ სექტემბერს დააფიქსირა პოზიცია, რომ გაზრდილი მოთხოვნიდან და მაღალი პასუხისმგებლობიდან გამომდინარე, უნდა დახვეწილიყო მიდგომები საგამონაკლისო წესით მოქალაქეობის მინიჭების საკითხზე.
“პრეზიდენტს მნიშვნელოვნად მიაჩნდა და მიაჩნია, რომ საგამონაკლისო წესით მოქალაქეობის მინიჭება უნდა ხდებოდეს უპრეცედენტოდ გამჭვირვალედ და მასში ჩართული უნდა იყვნენ საზოგადოების წარმომადგენლები”,-აცხადებს აბაშიშვილი.
მისივე ინფორმაციით, თვეზე მეტხანს შესაბამის უწყებებთან მიმდინარეობდა ინტენსიური კონსულტაციები საკითხის მოწესრიგებისთვის. მოლაპარაკებებში, აბაშიშვილის მტკიცებით, იუსტიციის სამინისტროც მონაწილეობდა.
“დღეს გამოჩნდა, რომ მეტი საჯაროობისკენ გადადგმულმა ნაბიჯებმა ცალკეულ პიროვნებებს მნიშვნელოვანი დისკომფორტი შეუქმნა. მაშინ, როცა პროცესი დასრულებისკენ მიდიოდა ჩვენ მივიღეთ წერილი საქართველოს იუსტიციის სამინისტროსგან, სადაც საუბარია, რომ აი, ამ საჯაროობისკენ გადადგმული ნაბიჯებით საქართველოს პრეზიდენტი, ვციტირებ, “უხეშად არღვევს კანონს” და ამის შემდგომ იუსტიციის სამინისტროს სააგენტო, კვლავ ვციტირებ, “მოკლებული იქნება ყოველგვარ შესაძლებლობას გავლენა იქონიოს გადაწყვეტილებებზე”, რაც დაკავშირებულია მოქალაქეობის მინიჭებასთან. საუბარია იმ გადაწყვეტილებებზე, რომელიც არის საქართველოს პრეზიდენტის კონსტიტუციური უფლება",- განაცხადა აბაშიშვილმა.
მისივე განცხადებით, საგამონაკლისო წესით მოქალაქეობის მინიჭების წესი აუცილებლად გახდება უპრეცედენტოდ გამჭვირვალე და მასში აუცილებლად ჩაერთვებიან საზოგადოების წარმომადგენლები.
აბაშიშვილის მტკიცებით, შესაბამისი ცვლილებები უახლოეს დღეებში სამართლებრივ აქტში აისახება.