2017 წლის იანვარ-მაისში ტურისტების რიცხვი 25%-ით გაიზარდა. ტურიზმის ეროვნული ადმინისტრაციის ხელმძღვანელის, გიორგი ჩოგოვაძის ინფორმაციით, საუბარია იმ ვიზიტორებზე, რომლებმაც 24 საათი და მეტი დაჰყვეს საქართველოში. ხუთ თვეში კი, მათმა რიცხვმა 981 668 შეადგინა.

რაც შეეხება საერთაშორისო მოგზაურთა ჯამურ რაოდენობას, ზრდამ 9.7% შეადგინა (2 329 677 ვიზიტორი).

იანვარ-მაისში მოგზაურთა რაოდენობით აზერბაიჯანი ლიდერობს (+5.6%), მეორე ადგილზეა სომხეთი (+13.2%), მესამეზე კი - თურქეთი (-17.8%). ხუთეულში არიან რუსეთი (+22.1%) და ირანი (+224%).

ზრდა ფიქსირდება ევროკავშირის ქვეყნებიდან, უზბეკეთიდან (+192%), ინდოეთიდან (+123%), ისრაელიდან (+55%) და ჩინეთიდან (+40%).

"2017 წელი ახალი რეკორდების წელიწადი იქნება. ჩვენ გავაუმჯობესებთ შარშანდელ მაჩვენებლებს, როდესაც ვიზიტორთა რაოდენობამ 6 მილიონს გადააჭარბა, ტურიზმისგან მიღებულმა შემოსავლებმა კი - 2 მილიარდ დოლარს",-აღნიშნა ჩოგოვაძემ.