86 ხმით 10-ის წინააღმდეგ პარლამენტმა „ადგილობრივი თვითმმართველობის კოდექსში“ შესატანი ცვლილებები პირველი მოსმენით დაამტკიცა.

კანონის პროექტის მიხედვით, 12 თვითმმართველი ქალაქის ნაცვლად 5 დარჩება.თვითმმართველის სტატუსს შეინარჩუნებენ თბილისი, ქუთაისი, რუსთავი, ფოთი და ბათუმი.

ტერმინოლოგიური ცვლილება ხორციელდება კოდექსის მთელ ტექსტში და შესაბამის მუხლებში ჩანაწერი „გამგებელი/მერი“ და „გამგეობა/მერია“ იცვლება ჩანაწერით „მერი“ და „მერია“.

კანონპროექტის პირველი მოსმენით დამტკიცებას წინ მწვავე განხილვა უძღოდა. ოპოზიცია მმართველ გუნდს 2014 წელს გატარებულ რეფორმას ახსენებს, რომლის მიხედვითაც, თვითმმართველი ქალაქების რაოდენობა 5 დან 12 მდე გაიზარდა და კვლავ ძველ მდგომარეობაში დაბრუნებას უკან გადადგმულ ნაბიჯად აფასებს.

მთავრობის ინიცირებული პროექტი პლენარულ სხდომაზე რეგიონული განვითარებისა და ინფრასტრუქტურის მინისტრის მოადგილემ წარადგინა. კახაბერ გულედანის განცხადებით, თვითმმართველი ქალაქებისა და თემების გაყოფამ არ გაამართლა, მუნიციპალიტეტების გაყოფის შედეგად არ გაზრდილა მათი საკუთარი შემოსავლები, გაორმაგდა ადმინისტრაციული ხარჯები, ხოლო შემცირდა კაპიტალური ხარჯების მოცულობა. გულედანის თქმით, ტერიტორიული ოპტიმიზაციის შედეგად დაიზოგება თანხები, რომელიც რეგიონულ ინფრასრუქტურულ პროექტებზე მიიმართება.