გადაუღებელმა წვიმამ სამეგრელოს რეგიონის რამდენიმე რაიონი დააზარალა. მდინარე ხობისწყალმა, სოფლების საჯიჯაოსა და ბიის მიდამოებში საავტომობილო გზა დატბორა. სოფელ ბიადან 4 ოჯახის ევაკუცია გახდა საჭირო.
ხობში მრავალბინიანი საცხოვრებელი სახლების სარდაფები დაიტბორა, მოსახლეობას გაუნადგურდა სასოფლო სამეურნეო სავარგულები, დაეხოცათ ფრინველები. მდგომარეობას ადგილზწე გაეცნო ხობის მაჟორიტარი დეპუტატი.
რთული ვითარება იყო წალენჯიხის რაიონის რამდენიმე სოფელში. ლიაში ღვარცოფმა მოსახლეობის ნაწილს გაუნადგურა ნარგავები, თხილნარი, საცხოვრებელი სახლების პირველი სართულები დაიტბორა. დაიმეწყრა საავტომობილო გზა სოფელ ქალაღალში, გარესამყაროს მოწყვეტილია 15-მდე ოჯახი.
გზის აღსადგენად აუცილებელია გეოლოგიური სამუშაოების ჩატარება, მოსახლეობა დახმარებას ხელისუფლებისაგან ითხოვს. ადგილზე მობილიზებული იყვნენ საგანგებო სიტუაციების მართვის სააგენტოს თანამშრომლები, პოლიცია, ადგილობრივი ხელისუფლება.
ძლიერი წვიმის შედეგად, ზარალი მიადგა გურიის რეგიონსაც. ჩოხატაურის მუნიციპალიტეტში დაიტბორა საყანე ფართობები. სოფლების ნაკადულისა და კოხნარის გზაზე და სოფელ სურების მიმართულებით მეწყერი ჩამოწყვა.
რთული ვითარებაა სოფელ ამაღლებაში, სადაც ნაკვეთები მთლიანად დატბორილია, დაზიანებულია რამდენიმე სახლის სახურავიც.
უხვი ნალექის შედეგად, ზარალი მიადგა ლანჩხუთის მუნიციპალიტეტსაც. დატბორილია საკარმიდამო ნაკვეთები. სოფელ შუხუთში მდინარემ ხიდი წაიღო. მუნიციპალიტეტში შექმნილია სპეციალური კომისია, რომელიც ზარალის ოდენობას ადგენს.