ხაშურის რაიონის სოფელ ქვიშხეთის მოსახლეობა მშენებარე სარკინიგზო გვირაბთან აქციას მართავს. სარკინიგზო გვირაბის მშენებლობის შედეგად დაზარალებულებმა გვირაბის შესასვლელი გადაკეტეს და მშენებლობაზე მომუშავეებს შესვლის საშუალება არ მისცეს.

ადგილობრივები სს „საქართველოს რკინიგზის“ კონტრაქტორ კომპანია "ჩინეთის რკინიგზის 23 ბიუროს" 2014 წლის 12 ივნისის შეთანხმების შესრულებას სთხოვენ. შეთანხმების თანახმად, სოფელ ქვიშხეთის ტერიტორიაზე გვირაბის მშენებლობის დასრულების შემდეგ კომპანია იღებს ვალდებულებას, ერთი მხრივ, სათანადო სპეციალისტების მონაწილეობით კომპლექსურად შეამოწმოს დაზიანებული შენობები, წყალმომარაგების სისტემა და სხვა უძრავი ქონება, ასევე, განახორციელოს შესაბამისი საკომპენსაციო ღონისძიება - აღდგენა ან ფულადი კომპენსაციის გაცემა. ექსპერტიზის დასკვნა მხოლოდ 6 ოჯახს აქვს, თუმცა ოჯახები კომპენსაციისა თანხას არ ეთანხმებიან.

სოფელ ქვიშხეთში სარკინიგზო გვირაბის მშენებლობამ რამდენიმე ათეული საცხოვრებელი სახლი დააზიანა. განსაკუთრებით მძიმე მდგომარეობაშია გვირაბის პარალელურად მცხოვრები 6 ოჯახი. პროექტი სახელწოდებით „სწრაფი რკინიგზა“ სს „საქართველოს რკინიგზამ“ 2011 წელს დაიწყო. ადგილობრივების თქმით მდგომარეობა 2013 წლის აპრილში გართულდა. მორიგი აფეთქების შედეგად, მიწისქვეშა გვირაბი ჩაიშალა და ე.წ. ძაბრის ფორმა მიიღო. მიწისქვეშ შექმნილმა სიცარიელემ გვირაბის გასწვრივ არსებული ქანების და საცხოვრებელი სახლების დაწევა დაიწყო. ქანების დაწევის გამო, სხვადასხვა სახის დაზიანება აქვს მიღებული სოფელში არსებულ ყველა სახლს. გვირაბის მშენებლობამ ასევე ხარაგაულის რაიონის სოფლების შორაპნისა და წიფლნარას მოსახლეობის ნაწილი სასოფლო-სამეურნეო დანიშნულების მიწების, ნაწილი კი საავტომობილო გზის გარეშეა დარჩენილი.