საფინანსო კომპანია „საქართველოს“ მიერ დაზარალებული კრედიტორები თბილისში, რუსთაველის გამზირზე, სასტუმრო „თბილისი მერიოტთან“ აქციას მართავენ.
აქციის მონაწილეების განცხადებით, სასტუმროში საერთაშორისო საფინანსო სექტორისა და საქართველოს ეროვნული ბანკის წარმომადგენლები იმყოფებიან, მათ შორის სებ-ის პრეზიდენტი კობა გვენეტაძე. აქციის მონაწილეები მასთან შეხვედრას და მოლაპარაკების დაწყებას მოითხოვენ.
აქციის მონაწილეები მათი კუთვნილი თანხების დაბრუნებას ითხოვენ და სინი ხელისუფლებას უმოქმედობაში ადანაშაულებენ.
საფინანსო კომპანია „საქართველოს“ კრედიტორები ასევე ითხოვენ, პარლამენტმა შექმნას კომისია, რომელიც საფინანსო კომპანია „საქართველოს“ კრედიტორების საქმეს შეისწავლის და უშუამდგომლებს ეროვნულ ბანკთან, რათა მოხდეს მათი კუთვნილი თანხების დაბრუნება.
ერთ-ერთი დაზარალებულის, თამაზ ჯანუაშვილის განცხადებით, პროკურატურა და სასამართლოს სრულიად უმოქმედოა. „როგორც ჩანს, ამ საქმეში ვიღაცის კერძო ინტერესები იკვეთება. გამოძიება უკვე რვა თვეა მიმდინარეობს, თუმცა დღემდე დაზარალებულების ზუსტი რიცხვიც კი არ არის ცნობილი. თუ ჩვენი ხელისუფლება არ გვაქცევს ყურადღებას, იქნებ საერთაშორისო საფინანსო ორგანიზაციები მაინც დაინტერესდნენ ჩვენი პრობლემით. აქ სწორედ ამიტომ ვართ“, - აცხადებს ჯანუაშვილი.
დაზარალებულები აქციების გაგრძელებას კანცელარიასთან და პარლამენტთან გეგმავენ.