მთავრობის ადმინისტრაციასთან შპს საფინანსო კომპანია „საქართველოს“ მიერ დაზარალებული კრედიტორები მთავრობის წევრებს შეძახილებითა და საყვირებით დახვდნენ. ისინი მთავრობას რეაგირებისკენ მოუწოდებენ და დახმარებას სთხოვენ.

აქციის მონაწილეების თქმით, ისინი უკვე 11 დღეა შიმშილობენ და მათთან შესახვედრად ამ დრომდე არავინ გამოსულა.

„დღეს ჩვენ ვითხოვდით მინისტრებთან შეხვედრას, მაგრამ ზედაც არავინ გვიყურებს. ჩვენ გვაქვს ევროკავშირისა და ამერიკის შეერთებული შტატების ელჩების პასუხები, რომ ისინი ჩვენ საქმეს თვალს ადევნებენ და ქვეყნის ხელისუფლებას მოუწოდებენ, მიიღონ სამართლიანი გადაწვყვეტილება. თუმცა, ჩვენი პრემიერი და მინისტრები კაბინეტებში იმალებიან. სახალხო დამცველი უჩა ნანუაშვილი აზერბაიჯანის და სხვა ქვეყნის მოქალაქეების ინტერესებს იცავს, მაგრამ ჩვენ ერთხელაც არ მოგვინახულა. ჩვენ გაგვძარცვა ხელისუფლებამ და კომპანია „საქართველლომ“, - განაცხადა აქციის მონაწილემ, ეთერ კოხტაშვილმა.

საფინანსო კომპანია „საქართველოს“ მიერ დაზარალებული მოქალაქეები ანაბრების დაბრუნებას მოითხოვენ. არაოფიციალური ინფორმაციით, თანხის დაბრუნებას 400-მდე ადამიანი ელოდება. საერთო ჯამში, თანხის მოცულობა რამდენიმე მილიონ ლარს შეადგენს.

დაზარალებულმა კრედიტორებმა საპროტესტო აქცია რამდენჯერმე გამართეს. ისინი კუთვნილი ანაბრების დაბრუნებას და პრემიერ-მინისტრთან შეხვედრას მოითხოვდნენ.