ჩვენ მივიღეთ კონსტიტუციის პროექტი, რომელსაც ნულოვანი კონსენსუსი აქვს, - ამის შესახებ საქართველოს პრეზიდენტმა გიორგი მარგველაშვილმა ჟურნალისტებს განუცხადა.
პრეზიდენტმა აღნიშნა, რომ ძალადობით კონსტიტუციის მიღება არ შეიძლება.
"იმის თაობაზე, რომ ასეთი სულისკვეთებით ვერ დაიწერებოდა ერთიანი თანხმობის დოკუმენტი, რაც უნდა იყოს კონსტიტუცია, ქართულ საზოგადოებას მოვახსენე დაახლოებით 6 თვის წინ. ის, რომ ასეთი სულისკვეთებით არ იქმნება გუნდი, რომელმაც უნდა დაწეროს თანხმობის დოკუმენტი, სამწუხაროდ, ეს გამართლდა. ჩვენ მივიღეთ კონსტიტუციის პროექტი, რომელსაც აქვს ნულოვანი კონსენსუსი. ამ დოკუმენტს ხელს აწერს მხოლოდ ერთი პარტია რაც აპრიორი ნიშნავს, რომ ეს არ არის თანხმობის ერთიანი სულისკვეთების გამომხატველი დოკუმენტი. მინდა, გავახსენო საზოგადოებას, როცა 95 წელს დაიწერა კონსტიტუცია, მაშინ ადრე იყო ჩვენთვის დემოკრატია, მაგრამ მაშინ პოლიტიკოსებმა შეძლეს თანხმობის დოკუმენტის შექმნა. ამის შემდეგ ყველა ცვლილება , რომელიც შედიოდა კონსტიტუციაში, იყო ერთი პარტიის მიერ დაწერილი, სამწუხაროდ, ის გრძელდება ახლაც. მინდა, მოვუწოდო პატივცემულ დეპუტატებს, თქვენ დღეს ხელში გაქვთ პულტები, ეს პულტები ქართულმა საზოგადოებამ მოგცათ, მაგრამ შეეცადეთ, ეს პულტები არ გამოიყენოთ, რადგან ძალადობით, თანხმობის გარეშე კონსტიტუციის მიღება არ არის სწორი ნაბიჯი, ნუ იძალადებთ პოლიტიკურ პროცესზე თქვენი პულტებით", - განაცხადა გიროგი მარგველაშვილმა.