კრწანისის გამგეობამ კალაში ავარიული შენობის კაპიტალური გამაგრება დაიწყო. სამსართულიანი შენობა საიათნოვასა და აბოვიანის ქუჩებს შორის მდებარეობს. სახლი გასული საუკუნის დასაწყისით თარიღდება, თუმცა, სპეციალისტების შეფასებით, ის მანამდე არსებული, უფრო ადრეული სახლის საძირკველზეა დაშენებული.

ძეგლზე მიმდინარე სამუშაოებს კრწანისის გამგებელი გიორგი კოპალეიშვილი ადგილზე გაეცნო. მიმდინარე წელს კრწანისში ეს მესამე ავარიული სახლია, რომელსაც კაპიტალური გამაგრების სამუშაოები უტარდება.

პროექტის ფარგლებში, სახლის საძირკვლის კონსტრუქციული ელემენტების გამაგრება მიმდინარეობს. ხის აივნების ჭვირულ-ორნამენტულ ელემენტებს რესტავრაცია ჩაუტარდება , რომელიც მცირე დანაკლისის მიუხედავად თავდაპირველი სახითაა შემორჩენილი.

აღნიშნულ სახლში სომეხი მწერალი და ეთნოგრაფი ხაჩატურ აბოვიანი ცხოვრობდა.
მწერლის საპატივსაცემოდ, 1938 წლიდან, ქუჩა მის სახელს ატარებს.

2015 წელს რაიონის გამგეობამ ხუთი, ხოლო 2016 წელს - ათი ავარიული შენობა კაპიტალურად გაამაგრა.