ძლიერმა წვიმამ პრობლემები შექმნა რუსთავში. ქალაქის რამდენიმე უბანში დატბორილი გზების გამო ავტომობილებით გადაადგილების პრობლემა წარმოიშვა.
დაიტბორა ლეონიძე-მესხიშვილის ქუჩები. ამინდის მკვეთრად გაუარესების გამო, დაზიანდა მაღალი ძაბვის, 110 კვტ-იანი ელექტროგადამცემი ხაზი, რის გამოც რუსთავის დიდ ნაწილს ელექტროენერგია შეუწყდა.
წვიმასთან ერთად ქალაქში ძლიერი ქარიც იყო. ქარმა მეთერთმეტე მიკრორაიონში ხე მოგლიჯა, რომელიც ელექტროსადენებს დაეცა და დააზიანა. დაზიანებულია ბუნებრივი აირის მრიცხველებიც.
ძლიერმა ქარმა სახურავი მთლიანად ახადა რუსთავში რჩეულიშვილის 15 ნომერში არსებულ ბინას. სახურავი ელექტროგადამცემ ხაზებს დაეცა და დააზიანა. შემთხვევის ადგილზე რუსთავის ვიცე- მერი და ინფრასტრუქტურის სამსახურის წარმომადგენლები იმყოფებოდნენ. ზარალის დათვლა დღეს დილიდან დაიწყება.