დემირელის კოლეჯის დაკავებული მენეჯერის, მუსტაფა ემრე ჩაბუქისათვის ლტოლვილის სტატუსის მინიჭების საკითხი დღეს გახდება ცნობილი.
როგორც ჩაბუქის ადვოკატმა საზოგადოებრივს განუცხადა, დაცვის მხარე ლტოლვილთა და განსახლების სამინისტროდან საკითხის დადებით გადაწყვეტას ელოდება.
ვახტანგ კვიჟინაძის განცხადებით, ადვოკატებს სოზარ სუბარის უწყებიდან სამართლიანი გადაწყვეტილების მოლოდინი აქვთ და სჯერათ, რომ მუსტაფა ემრე ჩაბუქი ლტოლვილის სტატუსს მიიღებს, რომელიც ექსტრადაციის საქმის შეწყვეტის საფუძველს წარმოადგენს.
„ლტოლვილთა და განსახლების სამინისტროში ჩვენ წარვადგინეთ მტკიცებულებათა ერთობლიობა, ასევე სოციალურ ქსელში მათი ოჯახის მიმართ განხორციელებული მუქარა. მუქარასთან დაკავშირებით ასევე მივმართეთ მთავარ პროკურატურასაც. საქართველოს იუსტიციის სამინისტროსა და მთავარ პროკურატურაში, სხვადასხვა ქვეყნიდან 4 ათასამდე წერილია შესული, რომ არ განხორციელდეს ექსტრადირება მუსტაფა ემრე ჩაბუქის თურქეთის რესპუბლიკაში, ვინაიდან რეალურად დასაბუთებულია რისკი, რომელიც პირდაპირ მუთითებს, რომ მას ემუქრება წამება და არაადამიანური მოპყრობა. მუქარამ უკვე მიიღო მისი მეუღლისა და შვილების საწინააღმდეგო ხასიათიც, რომელსაც აღარ მალევენ და ფიზიკური განადგურების მუქარას უგზავნიან, როგორც მუსტაფა ემრე ჩაბუქს ისე მის ოჯახს“, - განაცხადა მუსტაფა ემრე ჩაბუქის ადვოკატმა.
ადვოკატი საზოგადეობრივთან საუბარში აცხადებს, რომ იმ შემთხვევაში, თუ სამინისტროს მხრიდან არ დაკმაყოფილდება მათი მოთხოვნა, დაცვის მხარე ყველა საკანონმდებლო შესაძლებლობების ბერკეტის გამოყენებას გეგმავს.
„დაცვის მხარე ამოწურავს ჩვენს ხელთ არსებულ ყველა ბერკეტს, პირველ რიგში, გავასაჩივრებთ საქალაქო სასამართლოში, პირველი ინსტაციის შემდეგ გავასაჩივრებთ სააპელაციო სასამართლოში. იმ შემთხვევაში, თუ მაინც არ დაკმაყოფილდა ჩვენი მოთხოვნა, საქმეს გავასაჩივრებთ ადამიანის უფლებათა ევროპულ სასამართლოში“, - განაცხადა ადვოკატმა.