ე.წ ციანიდის საქმეზე მტკიცებულებების გამოკვლევა გრძელდება. დღევანდელ პროცესზე პროკურატურა 20 მოწმეს წარმოადგენს, მათ შორის არიან გამომძიებლები და ოქრომჭედლები.

პროკურორების მტკიცებით, სწორედ ეს ოქრომჭედლები დაადასტურებენ, რომ ნატრიუმისა და კალიუმის ციანიდს ოქრომჭედლობაში არ იყენებენ.

„კატეგორიულად დაადასტურებენ იმას, რომ ოქრომჭედლობაში არ იყენებენ ციანიდს. თქვენ გახსოვთ, რომ სწორედ ამას აცხადებდა წინა სხდომაზე დაცვის მხარე“, - განაცხადა პროკურორმა ზვიად გუბელაძემ.

დაცვის მხარის ადვოკატების თქმით, წინა სხდომაზე ბრალდების მიერ მოყვანილმა პროფესორ-აკადემიკოსებმა დაადასტურეს, რომ ციანიდს ოქრომჭედლობაში იყენებენ და ამ ოქრომჭედლების განმარტება მათთვის არ არის მისაღები.

პროკურორის ინფორმაციით, ე.წ. ციანიდის საქმეზე ჯამში 60-მდე მოწმე დაიკითხა და დარჩენილია კიდევ 108 მოწმე.

ე.წ. ციანიდის საქმეზე ბრალდებულ დეკანოზ გიორგი მამალაძეს პროკურატურა ანგარებით მკვლელობის მომზადებასა და ცეცხლასროლი იარაღის უკანონოდ შენახვას ედავება. წარდგენილი ბრალდებები 16-დან 20 წლამდე თავისუფლების აღკვეთას ითვალისწინებს.